吳佩慈坐擁50億身家　斥資過千萬塞班島搞電影節

吴佩慈自2014年為男友紀曉波產女後，宣布退出演藝圈，如今連仔都生埋兩個，但名份一樣係未有，不過唔緊要啦，有愛同有錢咪得囉。本身為澳門賭場股東嘅紀曉波，近年將事業發展到塞班島，當中最勁一項就係由紀曉波媽媽崔麗傑投資超過206億人仔嘅博華塞班度假村酒店，自年頭落成之後，已先後舉辦過高爾夫賽、超模大賽。

而為期三日的塞班國際電影節剛落幕，據知，紀曉波贊助逾7千萬台幣，到場除有香港導演羅啟銳、吳思遠、台灣導演王童之外，大陸導演馮小剛、演員張涵予、郭濤、張翰甚至韓國女團少女時代成員允兒亦都有出席，場面盛大。主人家吳佩慈亦都有現身，並且向一眾電影人表示：「如果有台灣導演想到塞班島拍片，來找我，一定有多方面的支持」。

吳佩慈同紀曉波之所以主攻塞班島，最主要係因為博華塞班度假村酒店已獲當地政府頒發40年獨家營博彩業務，零博彩稅之餘，每年只需繳交博彩牌照費1500萬美元。在當地擁有5艘遊艇的紀曉波，亦不時出動私人飛機將客人直送塞班島，令賭場開業未夠一年，已成為全球第四大賭城。而為打造賭業王國，紀曉波亦計劃在當地興建20間六星級主題酒店和主題水上樂園。現年39歲嘅吳佩慈雖然仍未嫁入豪門，但四年抱三嘅佢，單係收樓、收鑽戒已令佢坐擁50億身家。