【任噏亂評】農夫Do姐愈見默契　馬國明角色定位令笑位威力大減？

現正播放嘅《Do姐再shopping》已經係第二輯，鄭裕玲同農夫嘅化學作用，C君陸永轉數之快，令整個節目充滿笑料，大受網友歡迎。除咗佢地三個鐵膽，會有一位藝人做嘉賓主持，日本有黃翠如，而新一星期丹麥就搵來馬國明。本來網友嫌黃翠如喺節目中扮無知表示反感，點知輪到馬國明出現，反而又懷念翠如同農夫嘅笑料，唔通天然呆喺主持方面真係唔WORK？

先旨聲明，無講過丹麥篇唔好笑，單係去刀具店C君一句「Although唔使but(刀唔使拔)」已經令人拍案叫絕。不過整體感覺上，笑料密集程度上，真係無黃翠如嗰幾集多，明明馬國明最近人氣爆燈，成為今年視帝頂頭大熱，點解會有咁嘅反差？其中一個原因可能係佢招牌天然呆，雖然單係睇佢嘅呆樣已經好好笑，不過作為一個節目主持來說，單係背好資料其實唔足夠，試完有自己感受，又或者睇得好開心食完表現到好好味，先吸引到觀眾。食之前好呆食完又好呆，好似連主持都唔覺得好食，咁又做咩介紹俾大家呢？

另一個問題，其實唔係馬國明嘅問題，而係角色定位問題。大家都知主持一定有分上下把位，最佳例子就好似森美小儀咁樣，一個聰明啲醒啲，揶揄蠢啲笨啲嘅拍檔，儘管可能只係扮出嚟，但一醒一笨嘅配搭，就好似睇小丑表演都會一精一笨，先係觀眾百看不厭嘅法則。《Do姐再shopping》中，Do姐做上把係必然，農夫俾佢鬧吓打吓絕對無傷大雅，本來3個人已經係最好配搭，硬係要每個地方加多一位嘉賓主持，就要為佢再度身訂造一個角色。

日本篇中黃翠如繼續一貫傻大姐做法，農夫不時取笑佢，Do姐錫住佢之餘亦會不時話吓佢：「翠如呢度有試食呀啱晒你﹗」既係笑佢貪小便宜，亦放大佢嘅慳家性格，大家有個共同取笑對象目標明確，容易令觀眾投入。加上黃翠如話晒喺有線、Now都係拍旅遊節目出身，掌握節奏方面的確比較得心應手。反觀丹麥篇中嘅馬國明，明顯想建立有計劃有品味嘅上把位俾佢，講咩Do姐都話佢啱，揀嘅衫又話特別靚，背資料又話有做功課。

要造出反差農夫唯有做下把嘅下把，馬國明拍馬屁就讚佢食「聰明豆」大，農夫跟住擦鞋呢？Do姐唔受之餘仲話佢地食「臭丸」大……就好似網民所講：「主要笑點都係農夫同DO姐互笑，馬明加入變左農夫同一伙讚DO姐，想取笑馬明又好似要就住就住，佢讚左DO姐農夫又無理由踩，少左好多火花。」一句講晒，節目設定失咗平衡，希望下星期到蕭正楠加入，可以有番多啲化學作用啦。