【溏心風暴3】48歲唐文龍點解可以咁fit？　街頭體能訓練操到爆肌

好耐無拍無綫劇的唐文龍 (Michael) 有份主演TVB 50周年台慶劇《溏心風暴3》，雖然不是男主角但都依然好搶鏡。48歲的他完全無走樣，好似食了防腐劑咁，仲愈來愈man，型佬味出晒嚟，加上他身形Fit爆又大隻，網民更激讚他是港版水行俠，仲話好想快些睇他在劇中爆衫騷肌。在今晚播出的第17集，大家有眼福喇！他會同陳敏之偷食偷到去上海，仲一齊在泳池嬉水，震撼胸肌終於出現！究竟Michael有咩防腐秘方同操肌秘訣呢？Michael的體能又有幾fit呢？他接受香港01記者電話訪問時表示：「我一次過可以做90-110下掌上壓，狀態好就做到130-140下，sit up就一分鐘做到80下。」嘩，好勁呀！

Michael坦言要操到這副爆肌身形確是需要持之以恆，絕非一朝一夕可以練成：「我有打功夫、泰拳同練體能，每次練個半鐘已經好夠。我好少去做gym，而係會去公園做街頭體能訓練，例如好似軍人咁做豹跑，fing繩、蟹爬、掌上壓，爬馬騮貢馬騮架、大樓梯做級跳等等綜合性嘅訓練。我都有玩兵器，例如玩雙刀，可以令啲肌肉結實啲。夏天仲會游水。如果唔使開工我會每日都操，周末就休息，唔係嘅話好易勞損同受傷。」Michael亦無請教練指導，全靠自己在網上睇以及睇人練習來偷師。

目測Michael的胸肌至少都應該有44寸以上，不過他就表示自己從沒有量度過：「自己由細到大都有做運動，個胸係比較大，我會因為胸大而覺得唔好意思，係近年先流行大胸肌，所以依家覺得無所謂。」飲食方面，Michael不會戒口，但就會少食澱粉質：「夜晚8、9點後唔食晚餐，早啲食。如果夜晚口痕就會去做運動。有時拍戲拍到凌晨4點先返屋企，太肚餓我就會食個提子包甚至係高熱量嘅雞尾包，臨瞓前做20分鐘運動先再去沖涼瞓覺，咁就唔會肥。」

原來為了方便可以於家中隨時隨地都操體能，Michael的家還有個好特別的設計：「我裝咗條可以承受5千磅嘅鋼鐵喺天花板，好似樹枝咁可以畀我做馬騮爬，長度大約有5米，有轉彎位嘅，佔半個廳左右。我做嘅運動係少少時間有大大成果，慢慢累積，都有飲氨基酸蛋白質。」

問到今次是甚麼促成了Michael返無綫拍劇，他說：「呢套劇有好多高手前輩，而我係全部都無合作過嘅，家豪哥 (監製劉家豪) 同另兩個監製又一齊邀請我，大家都好有誠意。自己係飲TVB嘅奶長大，都想再同香港觀眾接觸返，亦都想新一代可以認識下我呢個演員。」至於他在《溏心3》所飾演的Nic到底是否反派？他說：「無可否認呢個人物嘅行徑同感情上都係反派嚟。(第幾集先騷肌？) 我同敏之有唔少床戲，大家一定睇到嘅。」