【溏心風暴3】金句潮語氾濫 又呃like又畀讚連小鳳姐都出動
撰文：張嘉敏
出版：更新：
無綫50周年台慶重頭劇《溏心風暴3》已經播出了第一集，大家睇完這集最有印象是甚麼呢？是在TVB「禁色令」下淨化版的陳偉琪色誘黃宗澤戲份？抑或是《溏心》系列中，老是常出現的連串金句呢？首集的《溏心3》就已經有不少金句，基本上整集的劇情可以說是用對白來推進，單靠聽唔睇畫面，其實都完全可以掌握到呢集內容講咩，明顯睇/聽得出對白的設計花了很多心思。
不過，亦可能會有人嫌劇中金句太多，幾乎所有主要角色在第一集入面都有金句出，甚至無啦啦都要講兩句，感覺過份刻意去講咁。除了金句，還有大量網絡潮語，直情多到氾濫，雖然將潮說加入對白中無疑可以令觀眾更有共鳴，內容亦可更加貼地，但太多就難免讓人覺得有些突兀，真心想問一句「使唔使成日講呀？」
好喇，大家就睇下第一集有那些金句和潮語的例子：一開場飾演黃宗澤小時候的小演員已經大講金句：「好多讀書叻嘅人都係同啲讀書唔叻嘅人打工㗎咋。」之後到真正的黃宗澤出場，他教王浩信追女心得：「媾女有所謂三不政策，不主動、不拒絕、不負責，依家再加兩個不，不要做狗公，不要去狗衝。」
當然唔少得「溏心」系列金句王夏雨啦：「急事就慢做，慢事就急做，事急則緩，事緩則圓。」好難明呀，好彩他隨即補充：「簡單講句，淡淡定有錢剩。」咁一早講呢句咪得囉，又硬要講金句先安樂。輪到司棋姐李司棋：「做人最緊要有頭家，有瓦遮頭，安居樂業。」「成日喺度呃like，畀個嬲你就差唔多！」仲有其他講了不止一次，兼不止一個人講的包括「呃like」、「有圖有真相」、「畀個like」、「肯肯定」、「開眉飯係咪應該有請小鳳姐呢？」連有請小鳳姐都玩埋，其實係潮定係out?
+8