【星光薈萃頒獎】苑瓊丹難得再現熒光幕　串盡農夫Do姐勁抵死

無綫《TVB馬來西亞星光薈萃頒獎典禮2017》經已圓滿結束，今屆賽果都好正路，可以說是沒甚麼驚喜，頒獎的嘉賓亦無甚特別，個騷甚至有些悶悶地。但是在頒獎禮台上久違了的苑瓊丹 （苑仔）出現，令全場氣氛即時高漲了起來，更成為了當晚最爆笑的一幕。今次苑仔擔任最喜愛TVB男女配角的頒獎嘉賓，近年全力轉戰內地市場的她，已很少現身於香港的熒光幕，觀眾都好掛住她演出的一些經典劇集又或是電影角色，例如《封神榜》的殷十娘、《皆大歡喜》 古裝版中的紗紗郡主、《唐伯虎點秋香》中的石榴姐以及《武狀元蘇乞兒》中的龜婆等。

昨晚苑仔難得再現TVB的頒獎禮台上，亦不負眾望發揮了她的搞笑絕技，串盡司儀鄭裕玲（Do姐） 和農夫，令台下笑到拍晒手。當苑仔甫出場時，Do姐即主動上前摟住她說：「Hug下先，好耐無見喇。」就連Do姐都掛住她呀。苑仔講到要奪得男女配角其實都要有得獎命，所以名就好緊要喇，她串爆農夫說：「嗱，你哋個名就衰喇，你哋個組合叫做農夫，咁你哋唱歌㗎嘛，你唱歌啲人聾嘅，咁你哋咪慢慢就枯囉。好彩你叫陸永啫，陸陸續續仲有得做，你的拍檔叫C君，嘩，屍骸遍地任君選擇咁嘅樣，唉。」說完茅頭又指向Do姐說：「Do姐你仲慘，佢哋叫你Do Do姐，你Do到謝晒，你睇下你依家人唔似人咁嘅樣。」苑仔你咁話Do姐真係好大膽呀。