【誇世代】李佳芯零死角唔怕低炒 keep fit唔使戒口：我乜都食
TVB台慶劇《誇世代》雖然收視不似如期，但帶挈不少觀眾同網友討論劇中演員，好似在劇中飾演Paris嘅李佳芯(Ali)，在各大討論區都見到好多網友留言大讚Ali皮膚好好，完全係零死角。早前她亦有講下自己的護膚心得，被網友譽為新一代「零死角女神」嘅Ali特別為《香港01》拍攝「角度的重要性」，由「高炒」到「低炒」都係咁靚，Ali都忍唔住話，「點解我無雙下巴嘅！」真係恨死唔少女生！
Ali新劇《BB來了》造型高清靚圖
今日Ali接受《香港01》時就透露自己嘅keep fit方法係行山，「唔一定要做帶氧活動，因為我唔鍾意行石屎路，我覺得嗰啲教育徑唔係山，我鍾意行泥路嗰啲，最經常行大嶼山、大東山芒草同埋龍脊都會去，話唔定大家行山會見到我。」講完呢句之後，搞到我即刻扚起心肝去行山呀！到底Ali有無肥過呢？答案係，「最肥個陣都係110磅，「我去到10幾歲嗰陣爸爸話我油浸都唔肥，去到後期自己血氣差，開始有babyfat同水腫嘅問題。20歲嗰陣開始塊面好包同啲肉好『拋』，嗰陣細嗰唔識去按摩排水，乜都飲乜都食咪由佢咯，唔會做任何嘢係去水腫。」
Ali強調當時係腫而唔係肥，「之後因為入左行要扮靚，開始會做運動同埋唔食咁多肥膩嘢，開始會幫自己按摩，都係入左行先識。」她表示一向飲食習慣都偏向清淡，「有時開工都會食飯盒，但都係揀清淡啲，反而食油膩嘢會肚痛。」唔怪得之Ali永遠都keep住咁瘦喇，她認為不需要特別戒口，「我自己乜都食，最重要係適量，就算係對身體好嗰食物過量都唔一定係好嘅。我自己有時都會食朱古力，但就係食黑朱古力，目的係可以提神同開心啲，因為你個人開心，消耗都會快啲同有影響。」
提到今日Ali出席新劇《BB來了》造型活動，出場時就頂住嗰「假肚」，唔洗問都知她在劇中要飾演一位媽媽喇，她表示婆婆生了9名子女，所以自小都有一大班表弟表妹一齊長大，「因為佢地個個都有陸續生，所以係我生活入面都唔缺乏小朋友，我都有幫佢地換過尿片，當然唔係初生BB。」同男友陳炳銓感情好穩定嘅Ali就話，完全無諗過幾時結婚生子，「因為暫時工作都排到好滿，所以更加無諗過，細個當然會plan，但大個發覺好多嘢都無得計，所以隨緣喇。」BTW，見到今日Ali嘅「大肚」look，都係嗰劇組，依然係咁靚！