【台慶．多圖】女星衣著成2018新娘指標 沈卓盈揀衫真係有一手
每年11月19日，TVB台慶嘅大日子，無論你睇唔睇電視其實都息息相關，特別係呢個星期結婚嘅新人，點解？因為全台上下女藝人都要出席台慶，個個都要著到靚一靚去賀壽。比著係你明知要夠搶鏡又只能著一次，唔通仲拎五位數買戰衣咩，九成女星嘅靚衫，其實來自城中大大小小婚紗店贊助，又要洗又要改，呢個星期結婚嘅新娘子，睇嚟少咗好多靚衫揀啦。不過作為旁觀者，好似下年結婚嘅準新娘就啱晒啦，可以一次過睇晒最新流行婚紗晚裝款式，順便可以望望年紀較大嘅女藝人晚裝，幫媽媽裝身呀嗎。
閃爆系列
之前流行韓式婚紗晚裝，好多都係以靚LACE作主打。不過潮流從來都係一個循環嚟嘅，今年台慶多位女星閃爆登場，首推沈大師沈卓盈。長袖露背銀白色魚尾長裙，盡顯佢嘅修長身型，低胸V領設計，事業線無都變有，有就變得更長，加上手工釘上珠片拚作花紋，用嚟March in夠晒搶眼，之但係魚尾比較窄身，行嘅時候要小心為上呀。
閃爆嘅仲有馮盈盈以及蔡思貝，不約而同揀選金色珠片晚裝，一個長袖一個tube dress，其實都係好大膽嘅選擇，因為一不留神好易變成70年代登台一樣。好在佢地都無多餘佩飾，盈盈扎起頭髮加上鑽戒耳環略縑成熟，而蔡思貝及肩微曲髮顯得青春活潑，頸鍊戒指通通唔戴，less is more，得分。
暗黑晚裝
傳統上老人家就唔多鍾意，要著記得問過先呀。近年多咗新娘揀選深色系晚裝，黑色顯廋呀嗎，多肉地至愛，不過並唔係全身都黑就得，要借助視覺效果先相得益彰。好似胡定欣呢件真係best choice，上身以黑色網裝入膊掛頸，下身配以粉色散裙設計，整體效果非常甜美，大裙擺又唔怕行步路都就住就住，正呀﹗
擔任主持嘅麥美恩其中一件晚裝，係黑色裙加上金色珠片，夠晒壓場。另外兩位媽媽級女星，呂慧儀以及陳自瑤都以深色晚裝示人，Yoyo上身透視不失性感，呂慧儀嘅晚裝前幅以深色珠片勾勒出S身型，拚以絲絨布料。兩條裙都係直身返計，啱晒生產過後嘅媽媽，可以遮住盆骨擴大嘅缺點。至於對自己身型有信心嘅，就可以一試張秀文嘅黑色DEEP V露腿，不過都係嗰句，黑麻麻都係問過老人家先好著
仙氣晚裝
除咗閃同黑，GFABLE嘅女仔好多會穩穩陣陣揀仙氣款式，好似姚子羚嘅粉紫晚裝，DEEP V得嚟好夢幻，唔會有過份暴露感覺；田蕊妮嘅飄逸透視袖口設計，成功為佢減齡兼增加仙氣；菊梓喬嘅印花裙，以及單文柔嘅吊帶蛋糕裙，都不失甜美感覺；劉佩玥嘅純白色丁DEEP V長裙，簡約而高貴，不過髮型略為累贅，綁起應該會更為可人。
挑戰性感極限
全晚最性感嘅，一定係邵珮詩，佢件戰衣腰以下係粉紅色繡花大裙擺，上身得一條布，繞過條頸遮住胸前重要部位，佢自己形容：「呢個look比較公主型，其實性感得嚟好elegant。」不過老老實實，如果婚禮著呢件晚裝，恐怕老爺奶奶會黑面離場，準新娘當作反面教材好啦。