【誇世代】35歲李佳芯一直keep住咁靚：拍完劇都會食宵夜
撰文：溫菁莉
出版：更新：
憑住《踩過界》Never一角在星和頒獎禮爆冷拎視后的李佳芯（Ali），有不少人稱呼佢做女神，叫得女神當然係因為靚喇，但Ali連素顏都一樣咁靚，皮膚又好！最近係《誇世代》百變造型look都令人眼前一亮，睇返Ali係2012年加入TVB到現在，嗰樣真係無變過，究竟係有咩保養之道呢？今年已經35歲嘅Ali接受《香港01》訪問時透露一開劇就無瞓覺時間，只能夠盡keep，「我嘅盡keep方法就係一休息嘅時候就即刻落妝，就算可能得3個鐘休息都盡選擇落妝。最重要都係做裏面嘅嘢，所有嘢外面盡力做都係無用！」唔怪得之Ali經常可以keep住「女神」樣喇！
+17
Ali就指自己好注重清潔保濕方面，「因為一唔夠瞓同埋公司嘅錄影廠嘅冷氣搞到皮膚好乾，所以一定係保濕方面做得好足。」另外仲有一樣嘢都係Ali好重視嘅，就係睇中醫同食下滋補湯水，「睇中醫對我地嚟講都好緊要，每款湯水都有唔同嘅功效，要因應返每個人嘅體質。好似我咁份人好容易凍，唔夠瞓搞到身體好虛又熱氣，都要睇返中醫調理返。」
係TVB拍劇出名時間長，有不少TVB女藝員對於宵夜都避之則吉，反而Ali就覺得宵夜係要食嘅，「始終太攰喇，因為有時講緊唔係淩晨1-2點，而係拍到5-6點。但我會見揀啲健康清淡嘅食物，例如菜同腸粉咁，少啲油膩嘅嘢為主。」
宵夜都儘量揀清淡嘅食物，咁係咪連甜品都唔會食？Ali就話會自備糖水，「因為我覺得食少少甜嘢係會令個人精神，尤其是好累嘅時候，當然未必要去到朱古力，雖然我有時都會食。但好多時候我會帶下糖水，例如紅棗、桂圓、黑糖或者係黃糖嗰類，令個人狀態好啲。」