黃真真與男友Gus相識15年：3星期前決定開訂婚派對

雙春兼潤月特別多人辦喜事，今年娛樂圈亦有唔少人選擇拉埋天窗。11月16號除咗有Anjaylia陳嘉寶公開婚紗照，仲有導演黃真真。佢喺Facebook上載3張同另一半嘅合照，不過佢唔只係有婚紗相，仲有一張訂婚派對邀請函，原來佢喺15號已經靜靜雞舉行訂婚派對。黃真真接受香港01訪問時話：「成件事好急，3星期前先決定開訂婚派對。」

黃真真嘅訂婚派對邀請函非常特別，就好似電影海報一樣，黃真真同男友Gus分別拎住槍，chok晒樣指向鏡頭，相片以黑白粗微粒製作，有點似西部牛仔片通緝相一樣，感覺就似「兇」緊賓客「唔係唔嚟呀嘛。」黃真真接受香港01訪問時話：「無求婚呢Part架，識咗Gus即係我男友已經 15年，拍咗拖5年，本身諗住開party慶祝認識15周年，點知講講吓就諗不如訂婚啦，其實都係3星期前先決定呢件事，即刻搵人幫手準備裙同埋book場地、Live Band。」導演都特別多謝好友幫忙，先可以臨急臨忙成事。

訂婚派對大約邀請咗100人左右，全部都係黃真真認識10年或以上嘅親友：「黃百鳴、鄭丹瑞、阿Fi薛凱琪都有嚟，大家一齊飲嘢隨意上台同Live Band玩，好開心。（有無感動落淚呀？）無呀，我地都無喊，想enjoy party，專登無講啲感動嘢。」

訂完婚下一步一定追問嘅，當然係幾時結婚啦，導演就俾咗個好好嘅答案：「問得好呀，我OK架結婚其實，不過我覺得自己唔會，因為好懶，平時拍戲已經要籌備好多嘢，到自己就會唔想煩。（可以淨係簽名註冊架）咁又想同朋友見吓面分享一吓，其實結婚呢啲就好似俾個機會，同一大班朋友親戚見面，尋晚訂婚已經好好玩好滿足，我諗應該就唔會搞結婚啦。」