湯盈盈買定豪宅再追仔 生埋第三胎做全職媽咪

靚太湯盈盈自從同老公錢嘉樂生了兩個囡囡凱晴和凱琪之後，雖然依然有做幕前的工作，但都放好多時間在照顧小朋友身上，將囡囡放在第一位，努力做一個稱職的媽咪。據知享受家庭生活同好鍾意小朋友的盈盈，其實有意想生第三胎，始終生了兩個女都會想追個仔，有這個心態好正常，如果可以為錢家生個慈姑椗就Perfect喇。身為老公的嘉樂亦都好願意配合太太，太太想生多個當然好啦，不過他就完全無畀壓力太太，話生仔生女都無所謂，最緊要BB健康，一家人開開心心，呢個老公好Sweet呀。

有雜誌報道指嘉樂為了準備迎接家中的新成員，已經買下位於港島區的半山豪宅，讓家人有更大更舒適的居住環境。消息指盈盈稍後完成了手頭上的劇集，就會停工開始全力造人。不過又有指盈盈早前孖住老公參加朋友婚宴時，她的身型看來有些脹脹的，令人不禁揣測她和老公其實是否已成功造人，只是怕BB小氣所以唔講得住，亦有傳他們計劃於兩年內生B。報道仲話由於嘉樂近年的事業發展得相當不錯，故盈盈打算生完第三胎之後，就會息影做全職媽咪，甘願為家庭放棄她的演藝事業，專心相夫教子，同老公實行男主外女主內。據知靚媽盈盈得悉有關報道時就笑言是自己太肥了才惹來誤會，如果有好消息一定會跟大家分享。