汪明荃入行50年喺半島酒店大搞　唐英年、范徐麗泰都嚟好有Face！

今年係汪明荃入行50周年，大台落重本幫阿姐大搞，Book咗尖沙咀半島酒店大堂舉行《汪明荃50周年世紀盛宴》，聽講係半島酒店第一次借出大堂被人搞活動，阿姐相當有面子！喺娛樂圈打滾咁多年，阿姐相識滿天下，今次邀請咗成120位重量級嘉賓到家，除咗係圈中嘅大哥阿姐級人馬之外，好似Do姐、羅蘭、胡楓、謝雪心、苗僑偉、夏雨、劉松仁、蓋鳴暉等等，仲有嚟自政界同商界嘅朋友，范徐麗泰、周梁淑怡，就連唐英年都嚟埋，真係仲大陣仗過TVB搞台慶！

嘉賓陣容仲勁過台慶：

真係唔係講笑，大台嘅藝員傾巢出席，王浩信、黃心穎、王君馨、岑麗香、王祖藍、李亞男、黃智雯、家燕姐、商天娥、宣萱，就連過咗檔去Viu嘅陳慧珊都有出現，仲唔止，今晚淨係做司儀嘅都有5個，仲搵嚟李克勤、楊千嬅、容祖兒做表演嘉賓，對上一次Joey同千嬅同台都唔知係幾時。

今晚咁星光熠熠，原來全靠阿姐親自出馬逐個打電話去邀請，宣萱仲話為咗去阿姐呢邊推晒所有工作嚟。阿姐一出場，身邊有殼王陳國強同樂易玲一左一右扶住入場，真係冇乜邊個咁有面子可以有咁嘅待遇，阿姐一身桃紅色長裙進場，珠光寶氣，阿姐霸氣咁話：「全部真嘢嚟！」，今晚嘅表演內容暫時要保密，未可以出街住，但阿姐透露Joey同千嬅唱佢嘅歌唱得好好，大家記得到時捕實個電視喇！