【再親我好媽】江美儀拍《親親我好媽》續集　洩幕後編導大換血

TVB近年慣例，收視理想嘅劇集就會乘勝追擊開拍續集，《使徒行者》、《溏心風暴》、《宮心計》拍完一輯又一輯。不過呢D大製作雲集一線小生花旦，唔係爭產就係勾心鬥角，一係就不停爆破同搵卧底，睇得多真係有D攰，有時小品溫情戲反而更得觀眾歡心。年初嘅《親親我好媽》由不被看好絕地反彈，唔少網民大讚該劇內容夠貼地，道盡一眾港媽心聲，而呢套劇亦準備開拍續集啦。

開拍續集觀眾就當然期望原班人馬上陣啦，何廣沛同江嘉敏呢日喺IG上載咗一段STORY，見到片段中有影到嚴家全家幅，相信劇集已經拍攝當中，演員似乎都繼續參演，但幕後就似乎大換血啦。《親親我好媽》由關永忠監製，盧美雲編審，不過睇番江美儀上載嘅劇本封面，監製變成李志倫而編審娛成鄭月明。翻查資料李志倫Jacky綜藝節目出身，係圈中著名MV導演，執導超過1500個MV，年初由余詠珊力邀回巢TVB，不過就無執導連續劇經驗，較為熟悉嘅只有《愛情來的時候》其中一個單元。新戲仲可唔可以延續貼地溫情格局呢？睇嚟要等下年播出先知啦。