【誇世代】46歲陳豪跳脫衣舞　畀李佳芯任摸肌肉

TVB 50集長劇《誇世代》劇如其名，真係好誇張。一係唔玩，一玩就去到好盡。第3集除了多次用「軟性手法」使用植入式廣告之外，幾位主角都好像在演藝生涯中，有突破性的演出，說的就是陳豪與李佳芯。陳豪一向形象都是Gentleman，「膠」極都是在《潮流教主》扮「老佛爺」Karl Lagerfeld；而李佳芯在《踩過界》飾演喜愛夜蒲的法官Never，行為舉止嫵媚，都好似已經去到好盡，今次在《誇世代》講誇張，兩人都好似開了大技似的，又脫衣又玩「虐待」，不禁問句：「媽呀！我睇咗啲咩呀？」

就係有一幕，李佳芯身為有錢人家嘅小姐，性格就定型為刁蠻任性，有錢當然玩乜都得，今次就是玩男人，陳豪就是被玩對象。陳豪上到酒店房，被李佳芯誤會是牛郎，作為一個有事業心，又對女性好似有啲抗拒嘅男性，聽到自己係牛郎當然好大反應，但因為李佳芯「持械」威脅之下，被逼就犯在眾多人面前大跳脫衣舞。

脫衣舞當然好爆，但重點就是陳豪一身肌肉。據知陳豪為了拍《誇世代》，找來了健身教練做訓練，計盡每星期食幾多卡路里、增加多少肌肉，用了兩個月時間，就有6嚿腹肌，所以這一幕一出，完美展現陳豪的身段。有不少女網民見到陳豪，不禁大讚：「陳豪真係好大隻，真係操得好fit！」46歲都可以短時間內操到好身形，陳豪真係好難得！