《降魔的》收視比《使徒2》輸個馬鼻 TVB應該拍多啲鬼怪劇
撰文：溫菁莉
出版：更新：
每年9月都是代表TVB踏入播出台慶劇的月份，而今年適逢TVB 50周年金禧，當然要動用大卡士同大製作，務求令劇集成為話題作，而收視亦不能失威。今年就由《老表畢業喇》及《使徒行者2》成為頭炮，可惜收視不似如期兩套大結局第一個星期平均收視只有23.5點及24點(已經包括埋跨平台)，當中《使徒行者2》未知係咪在內地視頻網優先播放，所以好多觀眾都可以先睹為快。
頭炮劇集的收視雖然不似如期，點都好喇，話咁快已經踏入播出第二輪劇集分別是《降魔的》及昨晚首播的《誇世代》。前者因為題材夠特別所以短短播出一個星期，不少觀眾都無點「彈」過，並認為好睇過《使徒行者2》。今日（7日）傍晚TVB就公佈上星期收視，《降魔的》平均有23.7點，相比起《使徒2》，雖然低0.3點，但也算是不錯的成績。馬國明相隔一年再參演台慶劇都有咁嘅成績，都算是吐氣揚眉，起碼唔會有「天然呆」嘅樣先！始終《使徒行者2》是第二輯，有不少觀眾都是基本盤(指第一輯的粉絲)，所以比《降魔的》，都是情有可原的。
其實《降魔的》卡上雖然無《誇世代》咁多大堆頭，但口碑卻不錯，皆因題材夠gimmick，始終TVB講鬼怪的劇集真的不多，要數上一套已經是2015年的由陳豪，胡定欣及田蕊妮主演《鬼同你OT》，首星期的最高收視已經29點，更令胡定欣及田蕊妮奪「視后」獎項。所以話呢，TVB如期拍咁多家庭倫理劇，不如花些心思在鬼怪題材上，相信更有發揮，至少唔會被觀眾覺得嚟嚟去去都係嗰啲劇種！