【森美旅行團】黃心穎打瓦片冇難度　挑戰超辣拉麵半夜肚痛

由森美、黃心穎、麥美恩、高海寧主持的《森美旅行團》，播出至今，口碑不俗，網民大讚森美做足功課，令觀眾娛樂之餘亦學到嘢，而且跟幾位女拍檔感覺甚為互動，製造輕鬆笑料，網民甚至認為半小時有點意猶未盡。不過觀眾睇得過癮，原來笑聲背後，黃心穎她們卻有很大付出，值得給她們一個Like。

森美一行人在節目中齊齊去試宇宙第一特辣拉麵，當時森美、黃心穎、高海寧一人一碗拉麵，各自選擇不同辣度，而高海寧揀選了最辣，黃心穎就中辣，而最古惑的森美就揀了少辣，兩個女仔先行起筷，只見黃心穎辣到標眼水，之後仲出現「豐唇」效果，而試最辣的高海寧，亦即時成塊面紅晒，確實是慘慘豬，看得網民十分心痛。到了森美起動，只是吃了兩口，已經面容扭曲，額角還開始冒汗，睇到這裏以為完場，原來還有無出街的精華。

黃心穎接受《香港01》訪問說：「食拉麵呢part都好好笑，初初好雀躍嘅，森美仲話妳哋真係食咁辣呀，唔好博呀，猛係側邊叫我哋唔好、唔好，當時佢真係好好笑。但我食食下開始打嗝，之後就成個人呆咗，因為真係好辣，仲開始胃痛，嘴又腫晒，拍完之後高Ling仲嘔添呀。（你哋食晒一整碗辣拉麵？）都係食咗兩三啖，拍完之後慢慢滲出嚟，覺得胃痛之後，我哋咪飲奶中和返囉。我夜晚返到去酒店仲肚痛，可能移到去腸度，咪肚痛囉。（仲敢唔敢試？）下次會輕手啲囉，其實係好食嘅，不過太辣啫。」

除了勁辣拉麵，節目中還有芫茜拉麵，見到一大鍋芫茜上枱，又是一次超級挑戰，但今次卻沒有黃心穎份，問到她想食超辣拉麵還是芫茜拉麵？她笑說：「俾我揀我全部都想試，而且我鍾意食芫茜嘅，反而佢哋幾個全部唔鍾意食嘅。（為何不是由你上陣？）每人都有啲唔同嘅項目，有啲係拍獨處時間，所以嗰part無我，但俾我下次去日本，自己都會去試，昨晚睇返都覺得好好食咁。」

在節目中還有一part是介紹日本現時至流行的「劈瓦減壓」，顧名思義，就是徒手劈碎瓦片，玩之前要簽下生死狀，而且只有一次機會，當然無得綵排啦，最令人意想不到是大大隻的森美，只是劈開4塊瓦片交貨，反而黃心穎就爆發小宇宙，挑戰15塊瓦片，最後更成功劈碎12塊，勁到爆裂，全場嘩然。

黃心穎就笑言：「工作人員好簡單示範咗一次，叫我哋劈落去紅色個點度，但都係劈一次架。我都算好大力嘅，記得有次去海洋公園玩揼鎚仔，我係一嘢揼到上頂，贏咗好大隻公仔，嗰時有啲朋友已經叫我做大力B。可能自己有跳開舞，知道啲力由乜嘢地方發出，由腳去到腰，再去到手，然後點樣用力，後尾睇返啲留言都好好笑，話我完全識得點樣運勁。」心穎仲話劈完那一刻突然呆咗，「打咁多塊瓦片係我要求嘅，諗住打到咪打，打唔到咪算囉，點都試下呀嘛。無諗過打到咁多塊，當時可能腎上腺素急升，冇乜點樣覺得痛。」心穎個樣咁嬌滴滴，原來出手都幾勁，緋聞男友馬國明不要行差踏錯呀。