【港女講感情】去旅行前要做資料搜集　其實杜如風喪買又有咩錯？

上禮拜森美個旅遊節目《森美旅行團》開播，佢主Key帶埋一班青春少艾好似高海寧、黃心穎、麥美恩去日本旅遊，睇個陣容直程係《學是學非》嘅旅行版，畀啲新意啦大台。有集講森美睇日落諗起老婆感觸到喊咗出嚟，好深情講咗句：「我覺得愛情原來有時候要對方唔喺你身邊，你先覺得需要佢。」全世界即刻吹捧佢係好男人，順帶連個節目都被人狂讚，話佢帶隊好有深度，食隻天婦羅都可以講到段故，解釋天婦羅唔係日本自創而係葡萄牙傳入，就連食松茸都可以搭到幾句嘴，係威嘅！

但唔明點解大家一讚森美，就要踩其他人去墊高自己，鬧嘅就係杜如風嘅《XX攻略》，話佢死港女淨係識食買玩，一啲深度都冇，似足「港燦」。仲大條道理話要好似森美咁，食松茸要知道松茸係點種，先至叫有深度，這趟旅行才算無負這一生，仲摷埋森美會考幾多分，讀邊間大學出嚟講，反過嚟話杜如風膚淺垃圾，What？先唔講旅行的意義，大佬你咁係人身攻擊喎，依家做主持人都要比較學歷，你唔搵麥明詩嚟講？杜如風未嚟大台嗰陣喺Now做旅遊節目，出名係傻更更，成功吸引到大家注意，先被人挖角過嚟，你鍾意睇旅行版《學是學非》，唔代表大家唔可以睇杜如風Shopping channel。

再者，你估森美真係同你自由行，全部行程、講稿都係自己Plan咩？Come on James，大個喇，你唔好再咁天真啦！去旅行一定要有意義嘅咩，講到要有得着咁誇張，不如飛去日本做義工算啦。其實鹹魚青菜各有所愛啫，去旅行可以去買嘢又好、行博物館又好、喪食又好、睇風景又好，就算日日瞓係酒店唔出街都好啦，都係個人選擇啫，你自己鍾意做咩咪做咩囉，唔需要強逼人哋同你一樣，去批評人哋嘅個人價值觀，輕鬆吓啦香港人。