龍虎豹合體開live　阿嬌講嘢咬字唔清：唔明點解我變咗低能　

前排阿嬌（鍾欣潼）取代黎明做金句王，自「個個都想拍拖，唔通個個都想拍拖咩」之後，嚇到張智霖都畀唔切反應，之後又冇啦啦講咩「唔通養狗唔可以嫁獸醫」，真係完全估佢唔到，就連身邊嘅好姊妹阿Sa（蔡卓妍）都救唔切場，究竟係阿嬌思維太跳脫定係大家轉數唔夠快呢？

尋日（1/11）有廣告商睇中英皇龍虎豹（容祖兒、阿Sa、阿嬌），喺Facebook開直播做宣傳，三個女仔一個墟，何況佢哋已經識咗成十幾年，坐埋一齊好似開籠雀咁嘈到不得了。Joey話原來佢哋私底下雖然好老友，但工作上好少有機會合作，所以平常都係用Whatsapp聯絡多。之後又解釋「英皇龍虎豹」呢個名嘅由來，Joey搞笑話：「可能因為我塊面大所以做龍。阿嬌鍾意豹紋所以係豹，而且佢跑得夠快。」身邊嘅阿嬌一直都想插嘴但又冇機會，終於都開到口：「因為我鍾意『Chair大炮』。」主持人追問點解叫「龍虎豹」唔叫「魚蝦蟹」，佢就話：「因為佢哋唔會去運動場，尷尬囉，被人踩。」

大家當然最想知道金句「唔通養狗唔可以嫁獸醫」，容祖兒同阿Sa力撐呢句說話一講就明，今次阿嬌唔怕尷尬親自解畫：「嗰個記者問我，你係香港某集團代言人，咁你又去人哋嗰間醫美，又同咗嗰個人一齊，咁我做代言人唔代表唔可以同嗰個人一齊架嘛。」就係咁簡單，其實係阿嬌諗嘢快到大家捉唔到佢路啫，之後佢笑住咁話：「我都唔明點解我變咗低能，因為頸痛，我嗰日睇完個新聞話條頸真係好重要，要好好保護條頸，咁條頸真係重要架嘛係咪先！我覺得啱嘅！」

阿嬌嘅情緒真係異常高漲：

今日好可惜聽唔到阿嬌講金句，但唔知由幾時開始，發現阿嬌做訪問時都口齒唔伶俐，講嘢一舊舊咁，又跳Tone九唔搭八，唔通蜜運中嘅女人，連好姊妹Joey都忍唔住講句：「你覺唔覺阿嬌今日講野特別大聲！」當大家係度傾計時，阿嬌又拎住個玩具「尖叫雞」係咁玩，又口噏噏咁話：「白切雞！白切雞！」唔知阿嬌係咪因為同好姊妹一齊做嘢，情緒特別高漲，真係好難捉摸啊！