林盛斌14年前做電台PA遭陳姓歌手白眼：係有種唔尊重嘅感覺

今年8月再度榮陞爸爸的林盛斌（Bob），日前就到訪荃灣一間中學，向校內學生分享他初入行做電台時的經歷，談到自己加入電台做DJ前，只是一名sales時，被其他人睇唔起兼被稱為「阿豬阿狗」。其後Bob初入行做電台PA時，就慘被某歌手無禮對待，「當年要搵歌手錄節日的祝賀說話，有位歌手我一定記得，我拿着寫上對白的紙和錄音筆搵他錄，他睇完對白後，竟然將張紙掉在地上，然後調頭離開。」其後林盛斌接受《香港01》訪問時說：「嗰陣直頭好似做戲咁！我相信嗰位人兄應該都唔記得呢件事，因為嗰陣差唔多係2003年，係有種唔尊重嘅感覺，可能佢對其他人都係咁。」

Bob坦言當時雖然心情低落，「呢一幕一定會記住，雖然當時不開心，但沒有氣餒，振作起來繼續工作。」咁到底呢位歌手係邊嗰？他就透露，「佢好靚仔，亦愛hip hop打扮。總之佢曾講過退出娛樂圈啦，不過又出返嚟，唔好講佢係姓陳。」看來答案呼之欲出了，但Bob就未有承認當事人係邊個，「嗰次事件發生後就同自己講，要努力做嘢做好自己，希望有一日會得到尊重。其實之後都無咩合作過，或者係公開活動見過面，大家都唔同範疇，唔係同一個朋友圈。」

Bob表示希望可以同學生分享呢件事鼓勵他們遇到挫折都唔好氣餒，「呢啲都係小事，將來到社會做嘢遇到更多唔同嘅困難，都要咬緊牙關去面對。」至於除了「呢位仁兄」之外，仲有無其他歌手都咁樣對阿Bob？佢就話，「其實都無乜，又好少出現呢啲人，呢個已經去到好極端，好似做戲咁。」Bob最後亦好謙虛表示自己現在距離成功仲有好一段路，希望盡力做好自己獲得他人嘅尊重！