【心冤】葉念琛繼續有阿寶情意結　今次竟然係佢取代鄧麗欣？

美國的福斯傳媒集團（FOX）推出迷你華語劇，將會在2018年第一季播出懸疑劇《心冤》，有惠英紅同黃秋生等重量級人馬。不過當大家知道係由葉念琛執導嘅時候，大家都不禁好驚訝：「乜葉念琛都會拍懸疑片㗎咩？」冇錯！你冇睇錯！佢就係撈埋電視個瓣！有「旺角活地亞倫」之稱嘅佢，對今次《心冤》作品好滿意：「呢套劇超越好多電視嘅尺度，尤其係血腥場面！」

講起葉念琛，都會諗起一堆「愛」字系列電影，每套嘅女主角嘅名都會叫阿寶，呢個係葉念琛嘅情意結。咁拍電視劇，仲要係懸疑片，呢個習慣會唔會有所改變？答案係冇！《心冤》女主角惠英紅就揭秘，話自己今次叫做「Madam Bo」，都係叫做阿寶，係最老嘅阿寶。而葉念琛就搞笑地話：「係攞得最多獎嘅阿寶！」咁Stephy咪…無論點都好，有葉念琛就會有阿寶，而阿寶就會以唔同方式呈現畀觀眾。

葉念琛撈多瓣，佢坦言越拍越有興趣，一來FOX嘅水喉好充足，二來佢都唔想只拍愛情片，「電影點都會拍，我一直做緊（愛情電影）嘅都會拍，但電視劇有幾個都仲搞緊。」至於係咩電視劇呢？葉念琛就保持神秘喇。