彭于晏爆肌有段古　勁念舊低調行善贊助體操選手

提起彭于晏貴為男神，萬千少女夢中情人，一身爆肌令女士愛慕男士羨慕，好多人第一時間會諗起《激戰》入面嘅熱血拳擊手，不過對佢影響最深嘅作品，應該係6年前嘅電影《翻滾吧！阿信》，戲中佢要飾演一名體操選手，令佢形象180度轉變，爆肌男神終於成形啦﹗而且Eddie原來仲好念舊，多年來默默贊助體育大學的體操選手。

剛出道嘅Eddie其實都係行白雪雪，文青小生路線，多數拍攝青春愛情戲，2011年，Eddie接下電影《翻滾吧！阿信》，一套講述台灣體操選手故事，為咗演好呢個角色，彭于晏堅持練咗半年體操。每日朝早8點起身，跟體操隊小朋友一齊訓練、食同住，一星期練足6天，喺呢段時間Eddie只食水煮餐增加肌肉，每天苦練12小時鍛鍊、長時間倒立練習，由文弱書生變成44寸胸肌及體脂率僅6%嘅魔鬼筋肉人身材。佢嘅努力亦得到大家認同，憑住呢套戲佢創下自己演藝事業首個高峰，第一次入圍金馬影帝。