張栢芝做拳賽評述？　直擊家中愛貓互片大嗌：睇住Attack

張栢芝早前開通個人Instagram後，不時上載生活點滴，跟粉絲分享她的喜樂，而近日最多出場的不是栢芝自己，或者兩個囝囝Lucas及Quintus，而是家中的幾隻小貓咪，最搞笑是栢芝跟其他貓奴一樣，很喜歡跟貓咪傾閒偈，而幾隻貓咪眼仔碌碌，又仿如真的聽懂她的說話，情景十分窩心溫馨。

栢芝家中的貓咪，各有不同性格，而且不要以為牠們一起住就一定好Friend，為了獨自霸佔主人，都會各施各法，而其中一隻灰色貓咪，栢芝就如此形容牠，「呢隻貓呢好惡嘅，要霸住全間屋嘅權柄，佢要控制晒所有嘢啦，邊隻貓入我房要經佢同意啦，我嗌第二隻貓，佢都會鬧我嘅。」穿著粉紅色Hello Kitty睡衣的栢芝一邊拍片，一邊叫其他貓咪的名字，果然激到灰貓紮紮跳，仲出手拍了栢芝幾下，當然是無甚威力啦，栢芝即忍不住輕撫愛貓背脊，要氹返貓咪「唔激你啦，It’s ok，傻豬豬」。

至於另一隻虎紋貓，亦很喜歡黐着栢芝，近日愛上親自設計，再用衣車造衫的栢芝，上載了一段車衫時的短片，而栢芝就突然化身記者，跟虎紋貓咪做訪問，「究竟點解你次次都要瞓喺我啲衫度呢？我訪問下你先，呢位朋友點解咁鍾意壓住我啲衫，無一倖免。」栢芝仲話希望當日可以有靈感車衫，而貓咪當然是繼續在栢芝的衫上做睡寶寶啦。

兩隻貓咪就好似後宮佳麗爭寵，渴望栢芝的關注，近日兩隻貓咪終於忍不住大打出手，而栢芝不但拍片直擊過程，還化身評述，「今日見到你哋精神晒，仲要係度搏鬥，我就放心啦，昨日你哋兩個郁都唔郁，嚇死我啦，Attack、Attack，睇住、Attack，啊，一比零，輸咗。」栢芝雖然講得精采，其實是兩隻貓咪在梳化上追逐，跟着虎紋貓輕輕打了一下灰色貓咪，都係屬於嬉戲居多，有栢芝這個好主人，貓咪當然生活幸福愉快啦。