【陳自強逝世】戴蘊慧感激多年栽培　帶赴日本發展：往事全浮出來

曾經捧紅無數巨星嘅「金牌經理人」陳自強，24號晚上於睡夢中逝世，曾經同佢合作過嘅圈中人都深感婉惜。已故音樂人戴思聰女兒戴蘊慧，當年曾經簽約陳自強，二人關係親密，戴蘊慧更稱呼陳自強為「老豆」，聽到Willie離世嘅消息，佢都大受打擊，後悔無珍惜眼前人，抽多D時間陪下佢老人家。

戴蘊慧於微博上載多張同陳自強嘅舊合照，包括當年二人喺寫字樓動筆簽約嘅珍貴照片，戴蘊慧留言話：「下午醒來時收到陳自強先生離世的噩耗，我震驚。想起去年今天，本約了老豆聚會，但因他行動不便，所以臨時取消了，第二次聚會，他邀請我去他家作客，在場有其他初次見面的朋友，我怕陌生所以又推辭了。。。我好後悔什麼不懂得珍惜和老人家的聚會。。。」宜家諗返轉頭已經悔不當初。

此外戴蘊慧亦講述當年同陳自強嘅緣份：「當年老豆簽下只有19歲的我，他愛錫我，親自帶着我去日本體驗市場，後來覺得東瀛並不適合年少的我，回港後怕我失望，所以送上一份香港新力的唱片合約。。。。他對我的種種的好，一段段的往事全浮出來，我好痛好痛好不捨。」字裡行間盡顯無限不捨。