台灣男主持白雲桃花不絕 中年肥大叔被日本女優投訴有小三
白雲登上搜尋榜十大位置，唔係藍天一朵朵嗰啲，唔係香港嫁咗人嗰位，而係46歲中年肥大叔白雲，有睇開台灣綜藝節目都應該認得佢個樣，面圓圓肚漲漲肥過阿Bob，身為扮嘢能手扮嗰個似嗰個，資深搞笑通告藝人一名。不過呢次上榜唔係扮嘢叻到攞獎，而係桃色糾紛，曾經參演《KANO》以及《賽德克．巴萊》嘅日本女藝人西田惠里奈(Nana)，公開同白雲嘅床照，哭訴佢一腳踏兩船﹗
還原返成件事是咁的，日本妹Nana曾經多次喺唔同節目中，表示欣賞白雲，甚至喺通訊軟件中同佢講「當砲友也沒關係。」嘅大膽說法。兩個人八月中終於傳出拍拖消息，點知上星期就有「知情人士」向傳媒爆料，話白雲同一位長腿辣妹邱小姐有曖昧，即係一腳踏兩船。Nana接受訪問時就哭訴俾人當小三兼電話騷擾，仲出示一張白雲露點床照證明二人關係。白雲喺13號上載短片，表示一切只係Nana單方面講法，9月份時見Nana同經理人發生問題，自己提議當面講清楚但被拒，覺得兩個人價值觀有差距所以漸漸疏遠，不過就無講出「分手」兩個字。
白雲表示最疑惑嘅係，Nana並無同佢提過邱小姐嘅事，反而直接去搵媒體爆料，令佢無奈表示：「要紅也不是這樣」。事件發酵多日，Nana喺經理人陪同下召開記者會，由頭到尾不停嚎哭，向白雲、社會大眾、父母同經紀人道歉，中途崩潰跑進廁所，傳在女廁向經紀人下跪，隨即離開，留下大批記者呆立當場。記者會後白雲回應話：「沒事了啦！都受到這『衝動的懲罰』了，原諒了。」
到底白雲呢個肥叔叔有咩過人之處，異性緣可以咁強呢？睇返資料，白雲2004年與離婚，當時前妻自爆收到白雲和小三的親密照片和「性愛光碟」示威；2015年被影到同長腿辣妹邱小姐一同過夜，今年8月中，則爆出同西田惠里奈交往中。網友話白雲入行初期拍過7、8套三級片，身邊密友亦爆料，話白雲不時吹噓自己嘅性能力，加上「別人不幫的事，他幫，別人不理的事，他理。讓女生就會產生依賴感。」令佢桃花運不絕。