台女主播黃若薇疑泰國洗霸王頭 被瘋狂批評急道歉
去旅行除咗飲飲食食暢遊景點，亦需要入鄉隨俗了解當地民情習慣，以免鬧出不快事件。有「新聞界小隋棠」封號嘅台灣新聞主播黃若薇，最近和友人到泰國旅行，疑似喺曼谷一間髮型屋洗霸王頭，完成服務後唔俾錢，被店家全程直播，登上多份泰國媒體！事件傳返台灣，引起大批網友討伐，痛批兩人「台灣人名聲被你們搞臭」。
入行多年，憑住甜美樣貌坐擁超過12萬Facebook粉絲嘅寰宇新聞台主播黃若薇，被爆出10月14日於曼谷一間髮型屋洗頭後不願付款，老闆娘趕到後示意員工開LIVE直播，並寫上「A common problem for Thai people!!! Chinese customer doesn't want to pay. They need to meet someone like this. 」可以見到當時係晚上11點，已經離關店時間超過1小時。片段中身穿白色衫嘅黃若薇同女友人不停講電話，老闆娘質疑佢地完成服務點解唔俾錢，雙方雞同鴨嘴，過程中黃若薇舉起手機想錄影但被老闆打掉手機。僵持過後，閨密率先下樓，黃若薇跟着出門被擋下，最後付錢了事，離開現場。
事件迅速於泰國各大媒體發酵，黃若薇15號凌晨4點幾於Facebook留言回應，指當時係因為髮型屋坐地起價，由250泰銖變成350泰銖，加上佢唔知道當地部分髮型屋只供應凍水洗頭，結果朋友只係洗濕咗髮腳決定唔洗頭想離開，但髮型屋要求收原價並被十幾人圍住無法離開，仲上載一段舉機想錄影但被老闆娘阻止嘅片段。黃若薇有為自己不知當地民情表達歉意，但仍遭到大批網友批評謾罵。
有識得泰文嘅網友翻譯髮型屋直播片段，表示老闆無話收佢朋友嘅錢，亦都只要求黃若薇俾番折扣後嘅250泰銖，同佢喺網上所講不符，質疑黃若薇只係提出對自己有利嘅證供。
事件發生24小時後，劇情峰迴路轉，黃若薇同朋友帶埋禮物以及當地翻譯人員，再次去到髮型屋，指因為唔了解當地民情而引發衝突感到抱歉，老闆娘亦釋出善意表示諒解，但希望佢地唔好對其他店家做出同樣嘅事，自己亦會檢討呢次服務上唔周到嘅地方加以改善，親手接過黃若薇準備嘅小貓公仔。老闆娘亦將呢段和解片段放上Facebook，同時見到多家媒體在場拍攝，希望事情正式劃上句號。