【釜山電影節】張東健與潤娥珉豪飲酒慶功 海雲台戶外會粉絲
韓國人氣男星張東健尋晚孖住少女時代成員潤娥，以司儀身份出席電影界盛事《第廿二屆釜山國際電影節》開幕，尋晚大會只喺播出張東健坐車去會場嘅片段就已經引起粉絲哄動，今日張東健就繼續同粉絲見面，好彩今日唔同尋日，天朗氣清，非常適合大家嚟到喺海雲台舉行嘅釜山電影節戶外分享活動。
張東健一現身，現場粉絲即刻發出歡呼聲歡迎佢到場，活動喺海雲台海灘前舉行，今年適逢張東健出道25周年，吸引唔少粉絲圍觀，其中就以日本嘅粉絲佔多數，張東健上台後先跟粉絲打招呼：「大家好，我是張東健。」然後再同現場粉絲分享演員心得，張東健又提到尋晚同咗潤娥@少女時代同珉豪@SHINee食海鮮拉麵兼飲酒，仲飲咗好多，主持人就笑說完全睇唔出張東健有宿醉。張東健仲自爆嚟緊兩日都有機會出現喺布帳馬車，粉絲有機會就要去釜山嘅布帳馬車撞撞男神喇！
[韓國直擊]少女時代潤娥8變5後現身釜山電影節 SHINee珉豪起哄動
張東健又講到有一日上電台節目就見到有好多粉絲留言，有講起《朋友》、《哭泣的男人》（韓文：우는남자）、《V.I.P》同《紳士的品格》等等，不過張東健就自嘲《V.I.P》同《哭泣的男人》就好似無咩人睇咁，又講到之後會俾心機再拍多啲更多唔同嘅作品。當主持人問到有無機會再同老婆高素榮（又譯：高小英）合作時，張東健就笑言：「如果要同高素榮合作的話可能會好尷尬，未必演到戲，應該唔係件易事。」
張東健時隔6年再次演出電視劇，扮演傳說嘅律師，而係戲中就要成日著西裝，主持人就問會唔會因為咁操fit啲，不過張東健就表示原來佢唔係好鍾意做運動，只係為咗角色先keep住。最後張東健仲有抽出台下嘅粉絲發問，同男神直接對話，而被抽中嘅一男一女粉絲仲可以同男神自拍，真係羨慕死人啊！
更多張東健在釜山電影節的相片：
我們01韓迷的facebook專頁Kpop 01已經開始喇！想知道更多韓國娛樂、飲食、玩樂、時尚資訊，快點去給like吧：https://www.facebook.com/hk01.kpop/