【反黑】監製陳國坤拎晒成副身家投資 「其實度好三季劇本」
陳國坤除了是《反黑》中的張sir之外，也是該劇的總監製。早年與《反黑》導演宋本中成立了製作公司後，雖有不少作品，但連老婆黃伊汶也曾經問過「到底你兩個咁多年做過乜？」如今劇集點擊率破8億，踏入結果周更隨時再多幾個億，更有國際視頻網想買入，衝出國際，係威嘅。
求星爺俾一個機會
陳國坤以「一拍即合、愛上咗」形容與宋本中的認識，由價值觀到出發點完全是一致，總是想在電影方面做啲嘢，但奈何一直被覺得玩玩吓，頂着厚臉皮去抵擋無數個打擊。「直到《功夫》，我求周生（周星馳）俾機會我哋做making of，終於有機會。然後就係用那一筆錢去成立製作公司。」打後的日子，雖然有過不少作品，但由於性質有點像「替身」，所以既沒名也沒份，唯有安慰自己當係多啲練習機會也好、當係為交租也好。「我哋兩個唔係要話俾人聽拍嘢有幾叻，而係唔會因為市場、投資者而改變呢，我哋就係有呢種態度。」不是沒有想過放棄，但讀書又讀得唔多，加上投放在電影上的時間或精神，令陳國坤有感根本走不了。「《反黑》只是個開始，宋本中最叻係cult，就好似火屎縫嘴一幕就係佢諗。你想做到自己嘢，都要站穩陣腳先得。」
《反黑》第一季的製作費為6,500萬，一分一亳也得來不易，陳國坤當初拿著故事去找投資者時，全世界都以為他開玩笑。「淨係得我、導演同編劇覺得好得，真係正宗打飛機。」幸好，當陳國坤與宋本中拎埋副身家出來投資，再加上部分演員首肯演出，資金才慢慢到手，如今看來，其實是一場大冒險。雖說陳小春、李璨琛等人全是friend底，但陳國坤非常認真的表示大家收的都是市價。「最多叫佢哋俾多幾日檔期。」正因為資金大部分都花在演員片酬之上，令製作費十分有限，筆者打趣說陳國坤應該要更無私才對。「我已經好無私㗎喇，只係收演員費，我都想多啲錢入袋。哈哈！」作為監製，永遠都覺得未夠好，第一季有不少低級錯誤，嬲爆過後保證第二季不能再犯。
陳小春有時太過「山雞」
首次做監製，陳國坤自問不算太嚴謹，但都總會有「執正嚟做」的時候，例如陳小春太過「山雞」時，「佢成日都會郁，或者有啲動作好山雞，都盡量撳，不過最好笑係開頭因為唔熟小羽（陳雅婷）所以好拘謹，我係咁同佢講唔好好似對住老婆咁至得㗎，要風趣少少。」提到小羽一角甚得男觀眾歡心時，陳國坤說一開始是想找個有吳倩蓮那種鄰家女孩感覺的，廣東話唔多正的人選其實考慮過應采兒，奈何她一開聲就太霸氣。「小羽在《歡樂喜劇人》係個性感打手，但當時佢個妝完全唔係呢回事，直到有人見到佢素顏，我同導演都覺得好啱。」不過，由於陳雅婷的廣東話超有限，所以基本上是聽完一句，就馬上埋位講一句，雖然偶有生硬位，但其角色的設定完全可蓋過一切。
髮型︰Tim Chan
化妝︰Yannes lee @ ndnco.co