【最佳拍檔】蔡少芬自爆恨嫁張晉 見戒指即應承：叫佢快啲幫我戴
現正播放的《老表畢業喇》及《使徒行者2》口碑都算不錯，其實兩套劇主角之一的蔡少芬及陳豪都是不少觀眾心目中的螢幕拍檔，分別合作多部劇集例如《洛神》、《火舞黄沙》、《珠光寶氣》及《飛女正傳》等。日前播出由黎芷珊的節目《最佳拍檔》就邀請了他們擔任嘉賓。當中黎芷珊就講到他們二人都是與圈內人結婚，問到有無好處時，蔡少芬就以「好到不得了！」來形容，她指雙方都好明白各自的工作，閒時亦會討論下即將拍攝的劇本，「我地會幫大家分析劇本同角色，點解你會咁樣去做呢？會一齊分享，會有好多唔同嘅進步。同埋我地好明白片場發生嘅事，佢有咩壓力咩開心，你都會好似親歷其境咁，因為你都好熟悉個個環境。」
講到同老公張晉拍拖嘅點滴，蔡少芬就指與對方拍拖5年期間經常問幾時結婚，「我覺得唔結就唔好拖咁耐，拿拿聲分開喇。唔好浪費大家時間，咁我青春不再喇嘛，雖然當時我都好青春。」而張晉有次就真係特別到香港向她求婚，「原本佢無我屋企鑰匙，就偷偷地問我家人拎。點知我屋企人嗰排就成日同我講『你好快就好開心喇！』我話我唔想知呀！我同佢講我知你想點喇，佢仲話點解你屋企人守不到秘密㗎。」Ada指之後張晉就話唔搞求婚，「當時拍緊《珠光寶氣》，佢就突然約我成班朋友係屋企度俾驚喜我，但佢地匿埋係廚房。老公同我求婚時，我一見到戒指就勁開心話快啲幫我帶，朋友同一時間就出黎，好感動！」
至於陳豪的過往的情史，他表示曾經與圈外人拍拖，但對方未能理解自己的工作範疇及作息時間，最終還是分手收場。其後陳豪亦大方透露當初與老婆陳茵媺(Aimee)拍拖初期的點滴，「好奇怪，相處耐左你就會知道個個係會係你老婆。」之後就講到與Aimee拍拖3年期間求婚過好多次，本身無諗住講嘅陳豪係蔡少芬要求之下終於講左幾句，「我係船度同佢求婚，之前同定船長講去到邊嗰地方就停，點樣鋪排點樣帶佢出黎，總知係好浪漫喇，你地幻想下！」