《溏心風暴3》李司棋做黃宗澤家姐 　好難接受呀！

眨眼又到10月，又是TVB的台慶月，今年是50周年紀念，當然要舉行盛大慶典搞大佢啦。剛剛播出的《TVB 50周年 華麗轉身 邁步同行》節目，除了有亮燈儀式外，還有多套台慶劇、旅遊節目以及網劇等介紹，十足一個節目巡禮。而最特別就是每套劇中的一班演員以劇中造型亮相，並即場上演劇中情節，讓觀眾看到他們的Live演出，無得NG㗎。

打頭陣上演的是《溏心風暴3》，有份出場的陣容包括李司棋、夏雨、米雪、黃宗澤 (Bosco)、阮兆祥、陳敏之、王浩信、岑麗香、黃翠如、唐文龍、李國麟以及莊思敏。播完該劇的片花之後，就到他們在台上重演劇中一幕。內容無咩特別亦無咩賣點，感覺就好似翻炒《溏心》1、2，只是換湯不換藥。

而臨近尾聲當Bosco出場講完一輪對白後，他竟然叫司棋姐做家姐！你無聽錯，係家姐，不是阿媽呀。司棋姐同Bosco年紀足足相差30年，點睇都應該做阿媽而不是家姐囉。假設劇中司棋姐同Bosco是同父同母姊弟，司棋姐阿媽是20歲生她，到生Bosco的時候都經已50歲啦，真係仲生得出？媽呀，我接受唔到囉