【入住請敲門】邦民女林婷日本另類住宿 男神莫竣名泥濘見繡花鞋

香港人對日本同台灣嘅情意結，隨時比起自己家鄉更濃厚，那怕是收工直奔機場都要來一個Weekend Getaway。如果你有鋪旅行癮，咁就真係要留意ViuTV下星期播出嘅《入住請敲門》，節目兩位主持人分別去到日本同台灣入住多間猛鬼酒店，甚而勇闖富士山下、有自殺森林之稱嘅青木原樹海，企圖擊破一啲都市傳聞，但結果係喊住收場……

節目分別找來邦民女林婷以及新晉男神莫竣名（Louis）做主持，毅然勇挑猛鬼酒店，佢哋都話當初一心諗去玩吓，結果當然無咁簡單啦。林婷於東京入住的其中一間酒店，是不少港人熱門之選，盛傳酒店的電梯去到某層數時都會自動開門，原因不明。「我哋由G樓入，去到6樓電梯門自動打開，走廊無人，但個掣粒燈係着咗，好似有人撳住，亦試過有一日，度門開咗之後閂唔埋。」到底係機件問題，定真係有嘢，林婷為安慰自己，只能選擇前者，不過佢話整個拍攝過程中，最驚都唔係呢度電梯門，而係入住位於箱根一間激似兒童病院嘅旅館。

由於旅館佈滿兒童讀物，而且洗手間、梳化及其他設施都相對較矮，所以極有兒童醫院感覺。「旅館出面有條路，我哋日間拍攝時，無意發現可以通去一間卡拉OK房，打開門之後，好大霉味，整個設計都好60、70年代，有張bar檯同兩部着咗嘅卡拉OK機。」林婷說同一晚上單拖走入該房做直播時，赫然發現其中一部卡拉OK機已關掉，但她明明在直播前查看過一切正常，在極度驚恐的情況下，她唯有停止直播，返回房間跟工作人員討論後，決定再次勇衝K房，結果發現另一部卡拉OK機亦都關掉……「第二日問旅館員工，佢哋話間房荒廢咗，唔會有人入去。」

在驚魂未定的情況下，林婷翌日去到富士山下有自殺森林之稱的青木原樹海。自多年前《完全自殺手冊》介紹過這森林後，不少人都冒名到此尋死，甚至傳聞只要走進去森林深處，就算不自殺，最終也會因迷路缺水缺糧餓死，或被野狗襲擊、凍死甚或被嚇死，而日本山梨縣警方每年春季組隊上山，不難發現遺骸。林婷說早上拍攝時感覺有點陰森，到晚上再次拍攝時，怪事又再發行。「攝影師自己行入去，由停車場入到森林入口時，佢聽到有人播歌，但周圍完全無人，如果有人開party的話，停車場應該都會有車，又無喎。」林婷之後用apps找到該首歌出自一個女子組合，而歌詞大意為「一個兩個手拖手，到最後所有形態東西都會變為無形。」為了尋求真相，大隊又再折返現場並企圖做直播。「但行到一半已經收得好差，而明明中午時訊號一齊正常。」

對比起林婷，Louis在台灣所經歷的，似乎較為輕鬆，就算這天訪問時，他也笑言擔心出來效果不夠驚。「我住酒店時，做晒所有唔應該做嘅嘢，例如讀聖經、浴缸儲水、開衣櫃。喺其中一間傳聞經常有母女出沒嘅酒店時，我自己一個對攝影機讀聖經，突然feel到有嘢好近咁喺我耳邊hehe咗兩聲，但回頭望乜都無。」Louis說自己一直都十分期待見到啲嘢，可惜整個旅途也沒什麼「驚喜」，他亦試過挑戰台北最強凶宅西寧國宅－－20年來超過30條人命於該地方喪生，包括意外墜樓、自殺跳樓、燒炭自殺、暴斃身亡等原因。「我同攝影師行上去荒廢咗個層，點知攝影師突然好急咁叫我走人。原來佢影到一隻新淨嘅繡花鞋，但嗰層明明係爛溶溶嘅泥地，又污糟又臭。」Louis說自己並非大膽之人，但在拍攝期間，愈戰愈勇，就連走入伸手不見五指的醫院廢墟，也並無心跳加速感覺。林婷返港後，跨火盤加廟宇拜拜，但Louis只顧享受手信，完全各走極端。