【港女講感情】戴唔戴婚戒唔係重點　男人唔想做總有千百個理由　

大台熱爆劇集《踩過界》啱啱播完，點知套劇第二季都仲未播，就傳套劇主角王浩信同蔡思貝有「續集」，有報導話喺慶功宴上兩個人神秘失蹤咗，仲傳出王浩信同陳自瑤分開住嘅傳聞，講到似層層咁，大家都大叫可惜，話唔值得因為達哥而唔要Yoyo。最後Signal Wong喺活動度回應兩公婆一啲問題都冇，覺得自己好無辜，只要一同女同事行近少少就傳緋聞，而一直都唔戴婚戒呢件事，佢就咁講，「我一向都少戴，因為怕整唔見，我唔會因傳聞改變自己嘅習慣，呢個只係形式，最緊要係心。」

通常睇戲成日見，男人偷食之前都會除咗隻戒指，好似象徵自己放低「已婚」呢個身份，一除就以為自己變做「單身」，結婚戴戒指，係代表住愛嘅承諾，仲話戴喺無名指，係因為無名指血管最接近去連接心臟，咁講就似乎太誇張。

其實婚戒最重要嘅用途係代表對其他異性嘅拒絕，大家見到你隻手有戒指，就好似話畀人聽你係「unavailable」咁，意義遠比愛嘅承諾嚟得實際好多。但時至今日，好多人都因為覺得唔方便，又或者自由主義而唔戴婚戒，好似Jay Z、威廉王子、Will Smith都冇戴。

係，的確唔一定要去戴婚戒去證明對婚姻嘅忠誠，要去滾嘅，依舊可以戴住隻戒指去出軌。但問題Signal哥你個底咁花，結婚前已經傳跟Cammi撻着，之後拍親劇又同套劇嘅女星傳緋聞，雖則話十個男人九個滾，靚仔唔靚嘅男人都會偷食，但你都起碼扮吓嘢，戴返隻婚戒扮專一。但依家講到明話唔戴，話怕唔見，唔會因傳聞改變自己嘅習慣，其實真係有心去戴嘅話，邊會咁易話整唔見，事在人為嘅啫，戴隻戒指咁簡單就可以畀到安全感老婆。

所以真係唔怪得Yoyo隔幾日就要喺IG到分享正能量，做女人唔咁時時鼓勵安慰吓自己，日子都唔知點過！