【專訪】黃心美離婚時靠妹妹支持度過　「我一滴眼淚都冇流過」

ViuTV最近播放的《暗中旅行2》，主持之一黃心美陪同訂婚情侶去日本旅行。情侶中的男方僅剩一成視力，劇組叫心美幫這對訂婚情侶拍攝婚紗照。心美初時不太想：「送畀個視障嘅就唔好送啲visual嘅嘢啦，但係後尾就覺得唔係喎，都幾好喎。」改變她這個想法的原因是女友Umi與心美的一番對話。Umi：「我好想趁佢仲有一成視力嘅時候，生個小朋友出嚟俾佢見到。」心美說：「突然之間覺得呢個禮物有意義咗。」

能為這對情侶拍照，心美感到滿意，但現實中的她，卻極討厭影相。她說：「我好憎影相，我連結婚相都冇影。」黃心美2010年與前夫結婚，經歷5年Long-D生活後，正式簽紙離婚。結婚時選了在峇里島舉行婚禮，在親朋戚友30多人見證之下牽著手走上紅地氈。夢想中的婚禮，婚禮之餘，順理成章的應該在峇里島拍攝一輯pre-wedding(婚紗照)留下美好回憶，但黃心美沒有。不拍婚紗照的原因，只是因為黃心美的性格，「我不嬲都話我係一個男人嚟，錯晒㗎啲嘢」。

一生人一次的婚禮，順理成章應該影婚紗照，紀錄動人一刻。但黃心美不單止沒有影結婚相，就連擺酒都冇，她說：「我最終結婚係冇擺酒，因為我好怕麻煩，好似做一場show俾人睇。我真心覺得我係要一個幸福婚姻，而唔係一個夢幻婚禮。其實我真係好憎影相，尤其是係做呢行(娛樂圈)成日都影相。你見我頭先影相好似食咗便便咁就知咩事。」

不止峇里島的婚禮簡單，黃心美就連選擇婚紗的過程也同樣簡單。「我好記得嗰時喺台灣上網睇(婚紗)，跟住返到嚟香港上嗰間鋪頭租婚紗。上到去我就話：『我要呢件。』因為我喺台灣已經揀完。咁我試咗，話：『OK喎。Fit身，就租呢件。』跟住個sales問：『吓，妳唔試埋其他，唔試多啲?』跟住我話：『吓，唔使啦。』size啱，又揀咗囉，點解要試埋其他。可能好多女仔試完又覺得第2件靚啲。但係唔會發生喺我身上囉。我個人就係咁，OK啦，唔好麻煩。」(好似男人咁?)「我絕對係一個男人。我不嬲都話我係一個男人嚟，錯晒㗎啲嘢。一個男人嘅內在，女人嘅外表，太恐怖。」雖然婚禮時婚紗照欠奉，但當時還是幸福開心的。如果每個女人都好似黃心美咁簡單，都應該都唔錯。

「我哋分開上去，冇嘢㗎。我一滴眼淚都冇流過。」簽紙離婚當日，黃心美還是在工作中度過。然而婚姻生活中，2人並沒有選擇一齊生活。峇里島行禮兼度蜜月後，一個回台灣進修EMBA(企業管理)，一個回香港繼續拼搏。「你而家咁問我，我只能夠答你，嗰排特別多人結婚。人人都結啦喎，我都結啦，都拍咗咁耐，唔結就分㗎啦。另外都要嗰剎那衝動，咁就做咗呢件事。嗰時有人問我你點解會結婚嘅？我嗰時會答，『right person at the right time.』而家呢，我就會話畀你聽，『衝動咗，可能係wrong person at the wrong time添』可能你下次問我點解結婚，可能都係因為衝動。」經過5年長距離愛情，似乎沒有與預期所願咁美好，5年後便離婚了。「因為佢過咗我嘅『底線』，呢個係『不能說的原因』。」黃心美喝了一口花茶，停頓了數秒之後續道：「我係真心覺得我需要做呢件事（離婚）。」

「我嗰段時間除咗喊之外，就係日日攤喺張床度背稿。」正巧碰上她工作最忙碌的時間，差不多每隔日就有一個司儀工作。「我好好彩，因為我有好多朋友同個妹陪住我，所以好快就捱過咗嗰段時間。出去食飯又有啦，唱K又有。我仲記得唱K係唱埋啲好慘情嘅歌，喊咪喊囉，喊完又一條好漢。嗰時覺得，首首歌都好似講緊自己咁。」或者黃心美當時的心情，就似她當時唱過周杰倫那首《安靜》，當中的一句歌詞一樣，「你要我說多難堪　我根本不想分開　為什麼還要我用微笑來帶過」。


髮型:Cedric Tsang@Nova Hair Nail
化妝: Dera Tse
服裝:Ted Baker

場地贊助：AWA Teasha Lounge