【爸爸去哪兒】陳小春原來係個女兒控　踎低畀小泡芙淋水都唔嬲

大陸綜藝節目《爸爸去哪兒》嚟到第五季，大家最關注嘅肯定係陳小春呢對父子，睇住囝囝Jasper畀陳小春鬧到暈，個個都睇到好肉赤。小春份人冇耐性又脾氣差，幾次鬧Jasper大聲到連路人都嚇親，可能大家都以為小春似係個嚴父，對小朋友惡啲啫，好彩Jasper由細到大都被媽媽應采兒調教得好，所以面對住小春的呼呼喝喝，佢都游刃有餘，仲可以淡定叫爸爸「Stop angrying」，真係要畀個叻佢！

但睇到第3集，驚覺小春竟然係個「女兒控」，前兩集佢已經不停讚劉畊宏個囡小泡芙好可愛，仲話好想生個好似小泡芙咁可愛嘅囡，見到小春望住小泡芙個樣，冧到佢！今集玩遊戲嗰陣，就要求各個小朋友喺爸爸身上噴一噴水，小春一見到小泡芙行過嚟，已經主動踎底準備等佢，點知小泡芙在佢背脊亂咁倒水，小春不但止冇嬲冇發脾氣，個樣仲好冧咁話：「謝謝，好舒服！」平日小春對住Jasper從未見過咁冧嘅樣，笑得非常燦爛，網民個個都話希望山雞哥快啲生返個囡，等個囡去治癒吓佢！可惜啊，之前傳媒曾經問過丁丁（應采兒），問佢有冇諗過生多個囡，佢就Say no咁話：「但是如果女兒長得像爸爸的話，就不是說特別好，所以我覺得生兩個兒子會比較保險。」小春如果想追多個囡嘅話，睇嚟要同老婆大人溝通一下。

但小泡芙又真係幾得意嘅！