【老表，畢業喇！】醜女橋無限Loop　呂慧儀唔認醜：都冇假哨牙

《老表，畢業喇！》是老表系列的第三輯，顧名思義，是借辦學盡抽香港教育制度水，但王祖藍近年多在內地發展，所以未播前被網民質疑會否劇情離地，但播出至今最搶眼的不是祖藍和郭晉安，而是唯利是圖，將辦學當做生意的阿Bob（林盛斌），而在劇中對她一片癡心的醜女D Chan，更是神來之筆，飾演該角的長腳蟹呂慧儀卻否認自己醜，「只係冇化妝，同打扮樸素啲啫。」最緊要是醜女可以大翻身，之後呂慧儀會搖身一變成為索爆女強人。

無綫劇集搵靚女扮醜，其實已經不是什麼新鮮事，《踩過界》蔡思貝的刀疤癲姐，《迷》中的劉思希玩大牙肉，再遠一點有《阿旺新傳》中湯盈盈飾演的倒及牙李笑好，《火舞黃沙》周嘉怡的兔唇女。以這些經典醜女做對比，呂慧儀確是不算醜，但平蔭頭配上超厚眼鏡，加上一身old school衣著，最攞命是迷戀阿Bob，一副花癡模樣。搞咁多花臣，無非為《老表》製造話題，不過笑不笑得出就見仁見智。

劇中BabyJohn不斷叫呂慧儀做嬸嬸，現時只得35歲的呂慧儀，卻以大嬸Look登場，她接受《香港01》訪問，指自己在劇中只是一個唔注重打扮的助手，「叫我做呢啲角色，坦白講我好welcome㗎，嘗試多啲唔同嘅嘢，其實都冇所謂啦，依家又結咗婚，生咗小朋友，唔使成日都咁靚啦。（接受演醜女的角色？）之後我會因為遇上一啲事，會由唔注重打扮嘅助手，變返做女強人。」明白晒，原來之後醜女大翻身，顏值反差肯定又會成為網民熱話，醜一陣都抵啦。

對於無綫的劇集經常要花旦扮醜製造話題，廿年如一日無新橋，「咁我以前都確係有睇過嘅，但我未試過做呢啲角色囉。同埋我唔係專登整醜自己，純粹係冇化妝，樸素啲啫，又冇假哨牙，大孖瘡呢啲嘢。」不過講到劇中最不合理的情節，相信是呂慧儀暗戀阿Bob，她也忍不住笑說：「劇裏面我係唔覺得自己靚嘅角色，係一個好忠心嘅助手，又好欣賞阿Bob，佢係一個好有才華嘅人，鍾意佢唔出奇嘅。」其實《老表》系列都係柴娃娃，胡胡鬧鬧又一集，觀眾又不用太過認真。