【TVB Secrets】無綫編劇超難入職　過到試用期都冇人工加

劇集好不好看，演員當然重要，但最重要是劇本，劇本當然是編劇的工作，套劇一「膠」或者太爛，網友第一反應「套劇邊個寫㗎？」，編劇其實承受好大的無形壓力。講真惡毒留言個個都寫得，但要成為劇集編劇就不是人人可以，起碼要經過兩輪面試，過足５關先可以入無綫當編劇，而首先無綫要請人你先有機會，阿巢（化名）曾經是無綫劇集組編劇，他大爆行內秘聞說：「通常都係官網招聘，但唔係年年都有，除咗填啲基本嘢，要寫一篇不少於800字的故事，如果ok就再面試啦，亦有啲熟人介紹，但好少囉。」

雖然有很多人說無綫劇集事事旦旦，但請編劇要求絕對不簡單，除了寫800字外，在面試時又要表現到急才創意，阿巢續說：「有兩次面試，形式都係差唔多，有一條情景題，要你續寫個故事，兩題揀一題，我嗰年係其中一條係２個女人喺超市嗌交，之後發生咩事？兩個女人咩背景，為乜嗌交？對白係點？結局係點？有冇驚喜？你有大約45分鐘去寫，跟住要見ACD（Assistant Creative Director )，要自我介紹，當然要funny啲，你當見寫字樓工死硬，但又唔好太出眾，你要好似可造之材，等佢哋發掘咁，就最一流，跟住ACD又要考你情景題，我嗰條係點樣問人借錢？考哂喇，返去等消息，呢個係第一次面試，佢哋見一次foul一批人，之後再second in。」

有意想入無綫當編劇的，就真係要問自己是不是創意無限，還要短時間就爆發到，阿巢話自己都冇諗過得，有時都要帶點運氣先得，他說：「當第二次面試，應該等個幾月啦，再去電視城second in，先考下你個人書寫能力，嗰次係考俾8至10個生字，好似蟹、老女人、電話、機關槍、紅色......你揀６個，然後串連一個故事出嚟，有大約30分鐘寫，然後再group discuss，幾個組員傾一個吸人年青人嘅故事出嚟，之後就等消息.....真係請你喇，叫creative trainee見習編劇，人工不會超過12000蚊，過咗試用期都係叫creative trainee，表現好出色、老闆又睇你的話，你就升做junior writer,試用期過咗，冇加人工喎。」

無綫編劇面試，其實難度很高，兩年前都有網友將編劇面試情境寫出來，被總監問寫一套２０集愛情長劇，你會點寫？之後再問如果拍一套３０集古裝喜劇又點寫？最後就問如果一套温情長劇，突然要埋尾咁又點寫呢？總知淡定、急智好重要，不過阿巢提醒：「太天馬行空，太高登、太cult唔得㗎，始終都係無綫,明㗎啦，有限範圍，佢哋接受到嘅創意就得㗎喇！」