【壹號皇庭第二輯】長髮王菲飾檢控官現身 24年前仲係叫王靖雯
撰文：洪曉璇
出版：更新：
TVB深宵劇場播緊嘅《壹號皇庭》，第一輯13集話咁快已經大結局，一眾劇迷晚晚邊追邊大呼過癮，緊接20號晚就會播《壹號皇庭II》，最受注目嘅當然係1993年仲用緊王靖雯呢個名參演嘅王菲啦。
「今天且忍心笑笑乾杯，可知一天我會蕩回，你縱會說已早改變，獨自夢下去都不悔」呢首《執迷不悔》雖然已經係24年前嘅作品，但宜家聽番依舊動人。王菲當年仲用緊藝名王靖雯喺圈中打滾，呢隻歌成為《壹號皇庭II》插曲唱到街知巷聞。當時仍然留有長髮嘅王菲亦粉墨登場，飾演新進檢控官唐毓文（Mandy)，戴住假髮於庭上振振有詞，無論是氣質上還是演技上，都堪稱一流，完全無新人嘅稚嫩感，不比女主角陳秀雯遜色。
王菲出道以嚟拍過四套電視劇，有三套都係TVB嘅劇集，第一套拍嘅係1993年嘅《原振俠》，王菲飾演一個精明能幹的女特工，COOL COOL地面上唔會有太多情感；另一套係近年勁HIT嘅穿越劇《千歲情人》，王菲喺裡面飾演秦朝一名舞姫叫胭脂，擁有不死之身，千年容貌都未曾老過，二千年後遇上方中信飾演一對，喺古代嘅另一半係洪朝豐，亦係王菲喺TVB拍嘅最後一套電視劇，其後要到2001年，先至再參演嘅日劇《弄假成真》。
宜家想再睇到王菲拍劇，機會率應該接近零，菲迷不停煲完又煲呢幾套戲，驚覺偶像演嘅角色都係個性鮮明，無論係COOL COOL地嘅女特工、喺庭上言詞鋒利嘅檢控官、還是擁有不死身嘅絕色舞姬，無論點睇都係演緊自己，非常王菲Style。
+3