【天使之路】為爭做Victoria's Secret模特兒　參賽者醜態盡出

國內最近有個真人騷名叫《天使之路》，簡單啲講就係愛奇藝同知名內衣品牌Victoria's Secret合作，透過節目選拔超模，再安排這位幸運兒直通VS舞台，雖然參賽人數眾多，但由於名額只得1個，所以節目才播出第3集，但已經出現欺凌、黑面、發脾氣、爆粗、退選等情況，完全係模特兒界《甄嬛傳》。

入選《天使之路》的模特兒最先有30位，到現在只係得返一半，年紀最細係19歲，最大係30。節目中，最先聲奪人的陸瑤，簡單一句「前男友太紅了，我們在一起的時候，他還不是唱《模特》的那個人。」已經令人即時諗起她同李榮浩的戀情，而剛好地，李榮浩於台北演唱會上公開同現任女友楊承琳的關係，真係夾都無咁準。

如果無緋聞炒作又可以點呢？唯有靠把口，90後吳月乃學生模特兒，知名度一般，但自從加入節目後，不時成為熱搜人物，就好似其好友王藝被淘汰時，吳月毫不客氣的連環炮擊另一名模特兒陸祺樺：「為什麼該滾的還不滾？從見到你第一面起，我就想讓你滾。」接連被孤立、單打，陸祺樺決定要退出節目，結果又被吳月指不尊重比賽，真係做乜都錯。

同樣係90後嘅袁博超，由於參加過不少外國品牌騷，加上曾登上意大利Vogue雜誌封面，所以由她參加節目時，已經呼聲甚高，不過第3集當她在電單車前跳起時，由於地滑跌倒，返到後台準備做訪問時，袁博超一開口就話：「有一種心情叫不想說話，我現在不想採訪。」之後更怪責工作人員為節目效果而見死不救。其實，模特兒喺T台跌倒時有發生，最緊要識執生，更何況，節目為求達到效果，經常奇招盡出。女人多，是非多，唔少觀眾都話《天》一班模特兒未到T台就已經無晒質素可言。