【爸爸去哪兒】吳尊老婆首現幕前 一家四口互動勁溫馨
撰文：洪曉璇
出版：更新：
中國傳統社會係男主外女主內，結婚後太太照顧家庭照顧小朋友就似理所當然，但現今社會講男女平等，或者正因為咁，內地綜藝節目《爸爸去那兒》長拍長有，令一眾平日Man爆男藝人展露慈父一面。來到第五季吳尊再次參與節目，除左帶住囡囡NeiNei以及囝囝Max挑戰不同任務，吳尊太太林麗瑩亦首次於螢幕前曝光﹗
最新播出嘅一集，去到汶萊吳尊大宅拍攝，吳尊準備帶NeiNei以及Max出發到機場，小朋友好乖咁幫手推行李，出門前跑去同媽媽道別，見到林麗瑩先是抱起Neinei，再抱起Max走到門口，手抱兩個小朋友出門口互相goodbye kiss，吳尊亦喺太太額上錫左一啖，然後依依不捨上車，一家四口互動實在太羨煞旁人。吳太首次現真身，不過就影唔到個樣，全程只見背影同聽到把聲。到呢集尾聲吳尊同仔女打電話俾老婆時，亦只開語音通話，有別於其他爸爸開視像對話，可見吳尊有幾咁保護老婆。
尚記得以組合飛輪海成員出道嘅吳尊，好快就紅遍東南亞，當時多次吳尊已婚產子消息，佢嘅經紀人都堅稱「尊嫂」其實是「吳尊大嫂」，而女兒則係吳尊家姐個女，至13年尾吳尊終於發聲明承認早已為人父人夫，並透露：「我對那份愛的執著從未改變，認定了就從一而終，為愛情、為未來的生活努力著。是的，我現在是擁有錢都買不到的角色…一個幸福的超級爸爸！」
吳尊曾經喺訪問中提到，老婆同自己同歲，16歲時因為姐夫介紹開始拍拖，女方家世顯赫，父親係汶萊王室嘅按摩師及營養師。由拍拖到結婚，吳尊出道變成當紅藝人，一直都極保護林麗瑩免曝光，只有一次2015年網友影到佢地到澳洲旅行，可以見到吳太有一頭烏黑秀髮，身形窈窕完全唔似已經生左兩個小朋友。
+4