【踩過界】做奸律師入型入格　林韋辰唔怕演壞人：好多反派彈出

《踩過界》作為一套法律劇，有盲俠同Never這兩個正派律師，當然都要有返一個咁上下實力的反派律師，林韋辰飾演的Gotham就是代表。今次是辰哥回巢TVB後第一套劇，不少網民盛讚他的演出入形入格，做到大律師的神髓。在接受《香港01》訪問時他說：「其實做呢套劇我都用咗好多時間做準備，咁啱我樓下住咗個律師朋友，佢又係好似盲俠嗰類嘅俠義律師，好多嘢我都會問佢意見，例如性格、身體語言、衣著等等。你見我喺戲入面成日都係著三件頭，其實現實中佢哋隨便好多，不過為咗配合套戲就無辦法喇。呢類角色我都係第一次做，為咗行出嚟要有氣勢，都下咗唔少功夫去學，因為對手係盲俠，一定要食住佢個勢。每一場法庭戲其實個廠都有好多人，後面啲旁聽請得足，所以一定要背熟對白，唔甩得，因為法庭係一鏡過，個場人又多，如果對白唔熟就會好易怯，之後就甩戲，所以都真係花咗好多時間落去。」

對於他第二次離開無綫的時候(2004年)，被指因為角色大多都是反派角色，沒有出頭的機會，所以才離開，他認為：「其實又唔係全部都係奸角嘅，第二次返無綫嗰陣例如《洛神》或者《楚漢驕雄》都唔算係大奸角，只不過可能同主角有啲對立咁。今次返嚟始終都係啱啱開始，《踩過界》入面Gotham其實都唔係奸嘅，佢只係有自己嘅一套，追求名利唔想輸官司。至於我下一套《雜警奇兵》雖然話係江湖大佬，不過都係客串吓，又唔可以作準嘅。其實對於一個鍾意做戲嘅人，都寧靜要一個反派但有發揮嘅角色，都好過一個正派但行嚟行去嘅角色。同埋你睇吓近年回巢嘅演員，好多時都係做反派彈出，幫到自己時又可以幫到套戲有張力啲。」除了幫自己和套劇，對於一些新人來說，有辰哥這樣的老戲骨幫手入戲，絕對是一件好事。

重返TVB後很快就得到重視被簽為親生仔，會否是為爭獎鋪路呢？他說：「其實我唔算親生仔嘅，因為我簽邵氏架嘛，對於拎獎其實都已經唔太上心架喇，自己以前拎過，試過嗰種滋味就夠。（學袁文傑拍電影？）平常心喇，有機會都會去試，傑仔（袁文傑）捱咗咁多年，都係時間要發圍架喇，我而家見到佢咁都好替佢開心。（再返大陸拍劇？）睇時間就唔就到，其實返上去都同開心，因為會見返好多舊同事，無論係演員定幕後，除時仲多過喺香港。」近來的確不少香港演藝界人士都北上尋求發展，始終上面人工高、發揮大，無論對前途抑或錢途都是一條最好的道路。