王祖藍新歌四字歌詞　Cosplay吳若希叫蔡芯若希

王祖藍策劃兼主演嘅劇集《老表》系列回歸在即，今集《老表，畢業喇！》唔再玩中港矛盾，改為主力探討教育制度，而為咗配合新劇，祖藍仲整新歌名為《越辣越愛》，取材自吳若希首神曲《越難越愛》，而全曲特別之處係歌詞只有「咖哩魚蛋」四個宇。MV中，祖藍明明係以《老表》代表人物蔡芯上陣，但佢就話自己係蔡芯若希，除咗全白造型扮足之外，連吳若希嘅一舉手一投足，祖藍都完全無甩beat，而且不時邊唱邊嘔泡泡，到底係搞笑定嘔心，真係見仁見智。

問到為何會好搞唔搞搞吳若希，祖藍笑謂別無選擇：「 TVB冇乜其他歌可以有版權，而我又熟嘅。（點解會淨係填四個字落去啲歌詞度，係咪偷懶？）哈哈，唔係，其實靈感係嚟自《雞全部都係雞》，我覺得好無聊，好好笑，咪照辦煮碗咯。（製作好認真喎）都係多謝導演同監製，佢哋追求得好細緻，我只係要求盡量似番吳若希原本嗰個，將啲水變成湯同埋加啲咖哩魚蛋落去，全部都係導演同埋台前幕後嘅功勞。（將吳若希搞成咁，驚唔驚佢嬲？）我唔驚佢嬲，佢抵抗力好強，點玩佢都冇事，佢分分鐘仲玩埋一份添，我都好期待有一日可以同佢合唱呢隻歌。」