黎諾懿住過劏房麵包吊命　5億駙馬都捱過窮：人生唔應該順風順水

今日有報道話「5億駙馬」黎諾懿原來有段窮苦辛酸嘅過去，年幼喪父家境清貧要領取綜援，入行後都要繼續捱窮，他自己亦承認確是有段日子幾窮困，應該是他在拍攝無綫劇集《溏心風暴》的時候。那時他曾經租住紅磡180呎月租$3000蚊的劏房，一日三餐都要捱麵包。好彩之後他憑住演出劇集《愛．回家》而正式脫貧，有穩定的收入，飾演角色「馬壯」亦令他人氣大升。香港01記者就有關報道致電訪問黎諾懿，了解一下他那時到底有多窮，他完全不介意分享自己的過去說：「我話一日三餐食麵包只是一個比喻，又唔係真是餐餐食麵包，係頻率比較高，因為麵包便宜飽肚，我都係買普通麵包店那些幾蚊個的腸仔包和腿蛋包之類，盡量慳啲，應使則使，食得飽就得。喺屋企煮公仔麵嘅頻率都好高，仲平過食麵包，間中都會買下罐頭。無咩必要都唔會出街，避免使錢。我相信每個藝人都經歷過呢個階段，要自己落手落腳去捱返嚟。」

至於所住的180呎劏房，他就謂環境尚算OK：「以前啲劏房唔同依家，我住那間都幾靚，有獨立廁所也有一個位置可以煮食，好乾淨企理，有啲似精品酒店，住得唔辛苦，有窗有冷氣，算係咁，合理的。」問到他拍攝《溏心風暴》時可有跟同劇藝人，例如他好友楊怡講及自己的情況，他說：「我個人唔鍾意報憂，無咩必要畀朋友知，唔係咩大不了嘅事，只不過係生活無咁富裕，我無因為咁唔開心。」最艱辛的日子，他的收入曾經得7、8千蚊，更加試過兩個月無工開：「7、8000蚊交埋租畀埋家用都所剩無幾，生活都幾困難，自己要好慳先得。」

捱得咁辛苦，究竟有無諗過放棄？答案係有，他確有諗過要退出娛樂圈：「經歷《舞動奇蹟》前我曾諗過再唔得就唔再做藝人，可以話係我嘅劈砲宣言，覺得做咗十幾年都無咩成績，不如算喇。可能個天眷顧我，畀我好僥倖咁贏咗冠軍，喺內地有啲知名度，公司重新發現我畀機會我。而喺內地拍《舞動奇蹟》逗留咗8個幾月，亦令我急促成長，之後返香港就拍咗《愛．回家》。《舞動奇蹟》是我演藝生涯的轉捩點，其實當時有得畀我揀，揀留在內地拍大陸劇，還是返香港拍《愛．回家》，我選擇了返香港，因為我嘅根在香港，我想喺香港做出成績嚟。呢個係年青嘅優勢，那時我唔服輸，覺得無理由香港做唔好就走返大陸發展，如果喺香港做出成績先再返大陸就唔同，當時有呢股傲氣，真係青春無敵。」

他坦言自從接拍了《愛．回家》後，收入都穩定了：「我做咗900幾集，呢個數字對藝人嚟講好多，一套劇通常都係得20集，就算我騷幾低人工幾低，拍咁多集都會有穩定嘅收入。（依家是最好環境的時候？）可以再好啲，如果有機會返內地拍劇我都會返。（捨得太太同小春雞？）小春雞係男仔嚟，要學識獨立，我又唔係返咗去以後唔再返嚟，作為一個丈夫同一個爸爸，我都想努力賺錢令屋企人生活好啲，畀我老婆都會揀不如我去開工啦。」而他做了「5億駙馬」後，生活並沒有比前變得富貴：「無咩特別，都是一樣咁生活，我和太太都唔係追求奢華生活嘅人，平日出街多數也是吃車仔麵、連鎖餐廳或是街坊食肆，簡簡單單。我反而要生活得比以前更加踏實，唔想畀人標籤咗我，要話畀人知我有踏實工作。自己本身唔係出身富裕，無必要因為咩身份去改變。我無因為我以前嘅經歷而喊過，比我辛苦嘅大有人在，我覺得人生唔應該順風順水，咁會唔識珍惜。」