【任噏亂評】內部訂票睇陳奕迅好穩陣？ 幫人訂飛隨時冇朋友做
「Eason麥花臣，唔好問我，無計。」「楊千嬅年尾拉闊？咁少位唔受訂票呀，自己去換啦。」最近於Facebook見過唔少Pr及唱片公司人員，紛紛出po戴頭盔，落閘唔幫朋友訂演唱會門票。唔係有好路數都唔幫朋友仔，逼大家幫襯黃牛(千其唔好，犯法㗎﹗)，不過大家又有無諗過行內人之苦呢？
近年睇親演唱會，公開發售時唔少FANS抱怨「又係絕望座位表」，即係大部分門票已被主辦商扣起，座位表顯示呢啲內部訂票嘅位置會變成黑色，公開發售時就只見漆黑一片得兩三成座位可以買，仲要面對有組織排隊人士，一人買十張廿張，輪到自己埋櫃位時，咩靚位都無晒啦。
咁圈中人又係咪一定訂到飛呢？又未必喎。內部訂票其實包括信用卡優先訂票、贊助商hold起一定數量送俾客戶、表演嘅藝人又話親友想訂一千幾百張、仲要hold起門票俾啲藝人呀、名人呀到場欣賞，仲有啲位俾傳媒去採訪，淨返嘅先輪到所謂圈中人落單訂票。
無論做記者定宣傳、經理人定文員，只要你入咗行，一有天王天后開騷，廿年前嘅同學都會忽然跳出嚟，噓寒問暖一番再叫你幫手訂飛，見過同事落飛數量高達五六百張，仲要有指定睇邊場幾多錢，十張連位分開坐唔要。喂呀，你估我做通利咩，要邊場有邊場，拎番幾百張飛番黎仲要逐個分好俾唔同人，做「分飛燕」好好玩呀﹗搞成日都未分完㗎，仲要約出嚟交收，真係時間車錢都蝕埋。
更過份嘅係，要內部訂票通常主辦方為求保障，會要求先入錢hold位，有時朋友講明會睇但唔得閒入錢，要代為墊支俾主辦方，點知俾晒錢先話「當日原來唔得閒唔要啦」「啲位麻麻地咋噃，都係唔去啦。」唔去唔緊要，仲要唔俾錢唔拎飛，搞到代訂嘅要自行散飛，實在係可怒也﹗呢啲唔係個別例子，身邊朋友就遇過十幾次，大拿拿墊左五位數出嚟，每次喺Facebook見到佢地放飛嘅po都會留言提醒：「以後真係唔好再幫人代出錢啦。」
五月天、陳奕迅、鄭秀文等紅星開騷，真係開多廿場啲飛都會俾人搶清光，當內部訂票爆晒唔夠分時，要cut飛就緊係由低層cut起㗎啦，唔通cut某某傳媒嘅總編咩﹗筆者就親身經歷過呢件事啦。尚記得幾年前蘇打綠於紅館開演唱會，本來唱片公司話可以入訂金落order Hold門票，筆者就幫朋友落左二十張左右，點知過左兩星期主辦方打嚟話唔夠分，cut飛cut淨六張並即時退返錢。由於筆者其實係無份睇嘅，只好將實況轉告朋友，點知就換黎朋友抱怨俾左錢都無得睇，搞得頗為不愉快，自始以後都唯有加入落閘行列啦。想睇嘅朋友，早啲起身上網又好排隊又好，靠自己買飛啦。