麥明詩回憶參選血淚史：慶幸當年毫無保留搏盡無悔

今屆香港小姐剛剛選完，賽果惹來不少爭議，身為師姊的2015年香港小姐冠軍麥明詩（Louisa）就無對此作出評論，不過睇住今屆港姐的誕生就令她回憶起自己當年參選時的血淚史，說明每一位參賽佳麗都付出過好多努力。她昨日在Facebook上載了一條她當時為初賽表演的練習片段，片中的Louisa一身運動裝打扮，不施脂粉，練舞練到流晒汗，當中仲有些高難度動作例如倒豎蔥，她留言表示：「好多人覺得選港姐嘻嘻哈哈，但係其實每一位佳麗都付出過好多努力！當年我為咗才藝表演，重拾久違嘅舞技，背後都可以話係有血有汗。宜家睇番，都好慶幸我當年毫無保留，搏盡無悔。」

「呢個世界從來都冇絕對嘅公平，有啲人天生靚啲有啲人冇咁靚，有啲人天生聰明啲有啲人冇咁聰明，呢啲本身就已經係世界嘅唔公平。追求平等機會嘅心係固然不可磨滅，但係同時間，喺每一個機會盡自己嘅努力同腦力，就係對自己最公平嘅方法。亦都好感恩當年能夠得到一個好嘅結果，因為真係冇嘢係必然，亦都冇咩係自己控制到。」看來Louisa都好明白選美的賽果是自己怎也控制不到的，這個世界根本就無公平，唯有盡力做到最好。

「分享一下幕後嘅片段，片段係初賽表演嘅練習！好多謝我個老師Rico，btw當時因版權所限所以都選了TVB嘅歌～ 因為好耐冇跳舞，所以開頭練番都將膝頭哥撞到瘀晒，係咪好驚嚇。不過見到最後嘅成果都好有滿足感。」畢業於英國劍橋的十優港姐Louisa雖然學歷高，但為人態度謙虛，為了應付港姐比賽中的才藝表演，都非常努力咁去練舞，練到對腳受晒傷都在所不惜，網民亦都紛紛留言支持她。相反今屆的出爐港姐冠軍雷莊𠒇，其超級自信的態度就被網民批評帶點自大兼目中無人，她在直播中表示：「Some people are not that educated……Not smart enough」咁mean的說話真係唔係個個講得出。