【爸爸去哪兒】陳小春吳尊趕山西錄影　冠名費升幅20倍點能唔拍？

內地真人騷《爸爸去哪兒5》今季找來陳小春父子，劉畊宏父女、吳尊一對仔女參演，日前先傳出由於節目過度消費明星子女，被廣電總局下令禁播，搞到唔少粉絲都十分暴躁，但隨即又有很多路人「巧遇」並「有圖有相」指出節目全隊人馬於山西錄影，而心水清嘅人亦都知道《爸》早於去年已改喺芒果TV播放（芒果TV為湖南廣播電視台旗下的互聯網視頻平台），難怪被網民質疑所有嘢都係節目嘅宣傳技倆。

其實內地嘅「限童令」早在2015年已經有，表面上影響唔少節目製作，但一睇到冠名金額，就點都會諗到辨法。以《爸》為例，第一季由於不被看好，冠名費約為2800萬（人民幣），拍馬都追唔上《奔跑吧兄弟》、《我是歌手》，直到節目開播之後，冠名費即時攀升到2億，去到第三季時，冠名費已經係5億，短短幾年升幅20倍，有誰不心動？

藝人方面，曾經有傳林志穎父子錄影第一季時，二人出場費為6百萬一集，而第三季嘅劉燁父子出場費更係逐日計，實收450萬一日，而因節目名聲大噪嘅男模張亮，當初出場費只得5千，到節目開播後，即時急升160倍至80萬，如此收入可觀的親子活動，試問邊個會拒絕？