【港姐2017有片】冠軍雷莊𠒇開LIVE還擊 大膽寸網民唔怕成公敵？
2017香港小姐選舉，喺一片O咀兼爭議聲中落幕，出爐港姐雙料冠軍雷莊𠒇賽前明明係大熱，但當選一刻開始就被一面倒狂踩，加上被揭有個富爸爸，網民送俾佢D嬲嬲堆到上頭頂咁滯。不過，不滿還不滿，港姐講明要美貌與智慧並重，Juliette當選第二日，決定直接開Live面對網民，逐點回應大家嘅批評。溫馨提示，由於鬼妹仔唔太識中文，直播係英文嚟嘅。
直播一開始Juliette話自己選擇用英文開Live，因為中文唔太好怕會表達上出錯，對於排山倒海嘅負評，Juliette從容回應：「我知好多人唔贊同我成為冠軍，這是沒問題的，因為不可能令全世界人喜歡自己，每個人有自己意見，不過認真講句，我唔係好Care(這些批評)，最重要應該是愛自己，我一直學習如何愛自己。」
提到被起底有個富爸爸，Juliette就講到：「其實唔係每一個人有受過足夠教育，以及有足夠智慧去了解每一件事，然後直接相信媒體、狗仔隊所寫嘅野。」Juliette又反問，大家咁唔滿意個賽果，唔通叫佢放棄個后冠咩？自己唔會咁做，只會花時間去報答自己嘅支持者。
直播後數小時，幾位出爐港姐會見傳媒，Juliette接受香港01訪問時亦有回應事件，溫馨提示，呢次講中文，但鬼妹仔唔太識中文，以下內容可能有點難明。
問到Juliette其實明知下晝會見記者，點解仲會網上直播回應咗先，佢話：「今朝上ig開直播，其實係想stop一d支持我同唔鍾意我嘅人鬥咀，我都知今日會見記者，所以想stop左佢地唔好再鬥咀先」睇番大部分comment，對你唔太識中文，以及樣貌比較有意見，會唔會考慮點改進呢，Juliette就話：「我唔會覺得自己唔係最靚，但我好鍾意自己會愛自己，呢d批評唔會動搖的嘅態度，唔會因此而去改變。」一當選就好似唔太得到網友歡心，怕唔怕之後喺幕前嘅路會較難行? Juliette就話：「唔會影響到我，因為覺得自己已經做得好好，亦無時間去呢d討論區睇，好proud of自己尋晚表現同埋走得到咁遠，同埋自己比較樂觀，呢d言論唔會影響到我。」直播中講到’ Some people are not that educated……Not smart enough’，會唔會覺得自己太MEAN? Juliette就話：「自己中文差，可能講出嚟大家覺得有d尖銳，不過自己只係想特別提出，教育係好重要，做運動係好重要，無健康有好多錢都無用，想鼓勵大家讀書讀好d唔好浪費父母嘅錢」不過，直播時你係用英文講架噃，關中文唔好咩事……
聽完Juliette嘅親身回應，唔知大家又接唔接受佢嘅講法呢？不過可以的話，Juliette真係要的起心肝盡快學好中文啦﹗