【私人會所】爆富二代秘聞被恐嚇 編劇筆華棋：有人叫我小心啲
繼《喜愛夜蒲》系列後，又有一套講述香港夜場的電影《私人會所》上映，召妓、夜總會、Clubbing、援交等等題材都玩過後，今次終於到會員專屬的私人會所（即私竇）。用上了比較新鮮的演員配搭，監製依然是《喜愛夜蒲》的雄叔叔伍健雄，導演則是第一次執導的顏米羔，著名專欄作家周顯和富二代作家筆華棋聯手編劇，無論製作人抑或演員更甚是題材都大膽起用新血。
如果有留意開筆華棋這位年輕人，你會知道他出過書，寫過專欄，做過網台，主持過ViuTV的《晚吹》。周顯曾經在專欄說過筆華棋的父親鍾仔，是十幾億身家的收租大王，家擁十多億身家。他出的書，在網上論壇的文字，很多都圍繞著富二代的秘聞，他更曾經因為這些爆料而被人警告過，他說：「俾人打爛咗車玻璃係真嘅，嗰陣我諗唔通我泊咗喺人哋個位度？但無理由呀，銅鑼灣大街大巷，我嗰陣無報警，如果報咗可能睇返天眼會知係咩一回事。跟住我都未有同人講，就已經收到個Message問我係架車係咪俾人整，但唔應該有人知㗎嘛，我都未同人講，佢就叫我下次小心啲，我有問佢係邊個要佢講嘅，但佢都無話我知。就係因為呢次事件，我知道就算要繼續寫都唔可以太真同太影射。久而久之，我就發現其實個故事係重要過個主角，唔係想俾人知道個主角係邊個，但可能之前啲故事太真，啲人會一眼就覺得我寫緊佢，我慢慢就學識咗係要去講道理多過揭秘。」
其實有人留意，證明這個話題是有市場的，但經過這一次事件後，筆仔都會有所避忌：「有時我都覺得好得意嘅，啲電影人睇完我啲書就會搵我傾吓，佢哋都會話睇完個故仔之後知道我講邊個，但嗰啲（富二代）其實唔係名人嚟喎，可能啲人曾經聽過呢件事，就會對號入座。好老實，其實我都會帶頭盔，如果要寫一啲好大件事，嗰啲富二代有財有勢，其實都會盡量避免，都係一篇文啫，唔寫唔會死嘛。」其實除了寫富二代秘聞，《點五步》的電影小說也是他的手筆，而且也試過填詞，在財經報紙寫專欄，你估佢唔到呢！
究竟私人會所跟以前的夜總會有甚麼分別呢？年代已經不同，再不是以前那般明買明賣，筆仔表示：「以我哋所講嗰間做例子，成套戲都係講緊俾錢入去追女仔，聽落去好荒謬，但其實好work。俗啲講句，啲客入到嚟唔覺得啲女仔係坐枱，啲有錢人咪buy囉。而家2017年所謂嘅好服務已經唔係好似以前《應召女郎》嗰陣明買明賣，原來係還原返基本步去返以前學生時代追女仔嘅感覺，唔係話你入嚟擺低一萬蚊就可以出街，唔一定會受你，啲女可能唔要你啲錢，當然中間會有好多心理戰。亦都因為好多喺入面做嘅女仔只係兼職，可能佢教琴，可能係做櫃台，可能係補習老師，佢哋好多都係有錢女。聽過好多例子，可能係老豆唔鍾意佢同窮男友一齊，所以個女仔要搬出嚟同男朋友住，佢會出嚟做，又唔使真係同你上床，又唔使同你錫，如果有人攬埋嚟最多咪避一避，去club好多時都係咁啦。佢哋嘅心態係，底薪又厚喎，講緊比較top嗰班有成三萬蚊底，你每晚返九至二，日頭又可以返多份，飲吓酒唱吓歌啫，唔收錢都同啲朋友做緊喇。啲觀眾無咁熟悉嘅，可能會諗：『有無搞錯呀？好人好者去呢啲地方？咩女仔呀？點同阿爸阿媽交代？』我當然唔係想講呢樣嘢係好啱，但當個社會真係日日咁發生緊嘅時候，我哋係咪可以當無事發生過？或者去指責呢啲人呢？一買一賣，講緊唔係肉體喎，係一種服務。你去到韓國一啲booking嘅club，你俾幾舊水個帶位，佢都會帶幾個女仔過嚟陪你，但嗰堆女仔只係客，咁唔通呢啲又高尚啲咩？咁究竟咩係啱，咩係唔啱，咩係cheap，咩係高貴，每個人都有自己嘅一套理念囉。」
歡場無真心，人來人往，每個人帶著慾望而來，留下金錢，離去時剩下的只有沉澱。有人擁美而歸，有人灑脫離開，亦都有人一無所獲，帶著遺憾，沉重的離開。得不到的，繼續追尋，一追再追，追趕的一分一秒原來從來未曾擁有過，俗語稱之為「沉船」。意思是太迷戀一件事，而那件事卻迷人得撲朔迷離，從未曾捉摸得到。在私人會所當中，沉船變得是平凡事，筆仔說：「好多人都沉㗎，沉得好緊要，以我睇沉船有兩種，第一種係喜歡咗會所入面嘅女仔喇，呢啲情況好多，都係錢啫。另一種沉就係你無咗錢，又輸埋感情，個女仔去咗搵第二個，呢啲都會有。我聽個一個好好嘅朋友講，佢係我哋電影入面藍本嗰間私人會所嘅大客，佢緊係話自己無沉過，不過佢話自己有個朋友沉船沉得好厲害，每次去親都50，50咁跌，咁50係幾多大家就自己諗喇，我自己諗就50萬。咁我就好奇怪，點解會無下文呢？佢同我講：『你去到嗰度就開心啫，開咗燈就第二個世界架喇』，我覺得呢句嘢好精彩，就算我哋喺會所入面玩得幾咁開心，但當出到街大家各自撞到朋友嘅時候，點樣去交代呢件事呢？究竟我講真話好，俾一個名份你，定係講大話去遮掩住個真相？背後其實好多嘢要諗。」
想知筆華棋還有甚麼經歷？留意下集。
場地提供： Mustard Seed