【燦爛的外母】推劇陪老婆生B 張穎康成好老公典範
新劇《燦爛的外母》七月煞科八月極速播出，一改無綫近年拍劇慢慢排隊出街作風，令大家都不禁想睇睇呢套劇有咩咁特別。剛剛播出兩三集，除薛家燕、黎諾懿、姚子羚、林嘉華外，仲有一位值得留意嘅演員，飾演豆品廠太子爺嘅張穎康。十月中將再為人父，接受《香港01》訪問時張穎康透露：「本身有套劇9月開，但老婆就生我想陪佢多啲，只好講句唔好意思。」
張穎康喺《2016年萬千星輝頒獎典禮》奪得「飛躍進步男藝員」後，今年產量反而好似少咗，暫時只得《與諜同謀》以及《燦爛的外母》兩套播出街，亦都Keep住徘徊二三線，未上到第一男主角之位：「唔會話拎獎後期望上位做男一，睇番呢幾年得獎者就知無呢回事啦，公司見你ok咪獎勵下你囉，無話一定捧你架。如果係嗰啲心態，會心諗俾完獎我做乜唔捧我，咁下年解得約啦﹗唔會有呢啲諗法架啦，做好自己就得。」
其實呢個訪問係張穎康喺台灣拍攝時，打長途電話返香港做嘅，返香港第二日又要開工，真係JOB接JOB無停過：「劇其實我keep住一直拍，早幾個月《天命》要剃頭，緊接就拍《燦爛的外母》，產量其實真係無少到。不過點解大家覺得我少咗開工呢，係因為《天命》hold起咗我個期6個月，咁中間就接唔到啦。」
嚟緊11月張穎康先再入劇組，中間嘅時間可以陪下囡囡，同埋張羅一下第二個BB出世嘅嘢：「其實本身中間有個劇想我接9月開拍，兩套劇疊住拍，體力上我應付到，不過因為老婆10月中生BB，經過上一胎本身好樂天嘅老婆產後情緒上唔多妥，今次我真係想陪佢多啲。只好同監製講聲唔好意思接唔到。」
提起家人，聽把聲都感受到張穎康係個好老公好爸爸，佢同老婆麥雅緻共同用一個Facebook Page，不時上載一家人嘅合照，提起囡囡小豆仲眉飛色舞：「由《東坡家事》播出，小豆一歲幾已經知爸爸係做戲，之前睇電視見到爸爸錫第二個女仔，個女會即刻錫番媽咪，好攪笑，好似怕媽媽唔開心咁。老婆同我講尋晚有場戲我去大排檔食飯，個女又會問點解爸爸出街食飯，但睇完又同我facetime，攪到佢有啲混亂咁，所以成日講俾佢聽爸爸拍戲唔係真，不過太細個啦未知發生咩事」
張家好快就會由三口子變一家四口，廣告都有話養大一個小朋友要近500萬，不過張穎康就話財政上無太大壓力：「多個人多雙筷啫，我嘅人生目標其中一樣，就係想一家有四口，完成埋呢次就ok啦。(會唔會希望好似黎諾懿咁，做咗爸爸之後接多啲廣告?)都唔關事嘅，唔想因為小朋友出嚟多工作，作為演員做好啲戲就得，戲外就做好個爸爸，唔會去諗生個女好旺自己錫佢多啲，咁如果生多個行衰運，唔通怨小朋友黑住自己咩？」