【天鴿風球】森美小儀冒險出門：我哋搵條命搏返工呀﹗

強颱風天鴿正面吹襲本港令天文台於今早發出十號颶風信號，大部分的打工仔都因此而不用上班，多了一天假當然開心，不過當你心入面正放緊煙花請緊小鳳姐出來慶祝時，其實亦有很多人仍要冒住十號風球繼續返工，緊守他們的工作崗位，森美和阮小儀就是其中一員。即使打十號風球兩人亦要返電台做直播節目，為市民帶來娛樂和資訊。森美今早就於他的facebook上載了一段他孖住小儀在十號風球下上班的短片，並留言表示：10號風球下驚險返工記! 又大風又冧樹好危險! 真係搵條命博開咪畀你聽! 
 

片中森美和小儀一起乘坐電台的公司車返公司，由於拍片者是森美本人，所以片中只聞其聲不見其影，但就可以見到坐在他旁邊的小儀，司機就接送住兩人，車窗外下住雨，路面也出現水浸情況。森美一開聲就謂：「我哋搵條命搏返工呀，我哋依家搵條命搏返工，我同小儀喺車度。」小儀即笑森美說：「你咁近距離都話搵條命，我叫埋公司車叫司機哥哥車埋你，如果唔係你要自己行上去呀。」森美續說：「我哋依家搭住呢架鐵甲威龍呀，四周圍的樹木跌晒落地下，嘩，你睇幾大棵樹，見唔見到地下幾大棵樹呀，對於螞蟻來說。」一看路旁確有些小樹枝折斷在地上，小儀也忍不住笑。當司機駛近商台時，森美就表示：「好安全返工喇，好在咋，托阿小儀幸福，呀，唔係，係托小儀鴻福，開工見。」小儀即說：「是旦啦，咩福都好啦。」此時兩人見到有輛的士停泊在商台的停車場內，即表現驚訝，森美繼續發揮搞笑本色說：「個的士司機見危險入來避難呀。」不少網民都留言表示辛苦晒森美、小儀和司機，叫他們要小心，又多謝所有冒住十號風球返工的前線人員。而森美之後亦繼續在他的facebook進行颱風片段大放送。