巴士阿叔哼歌少年播歌互嘈　吳業坤：佢咁做EQ唔夠

巴士不但是公共交通工具，還可以看盡人生百態，讓座給長者小童大肚婆固然是美德，但遇上更多的是讓人討厭又火滾的行為，直頭當正是自己屋企，想做就去做。好似幾個人明明相識一起上車，卻偏偏要分開坐，隔住幾個座位傾偈，聲浪大到嚇親人。也有人在巴士上食撈麵、食壽司，令全車充斥食物氣味，仿如變了美食餐車。至於剪指甲、搣腳皮這些行為，更是令人相當噁心，以上種種聽落好過分，但又確是大家也有機會遇上，只能歎句「唔好彩囉」，有乘客選擇死忍，亦有人絕地反擊，以牙還牙。

近日網上流傳一段巴士短片，有位阿叔在車上哼歌，仿如玩緊「超級無敵估歌仔」，唱得相當投入，旁若無人。坐在他身後的巴打忍無可忍，取出手機開大喇叭，用周柏豪的一首《我不要被你記住》反擊，咁都未算，更將手機放在哼歌阿叔的耳邊，並拍片放上網。不過其他網民似乎不大支持巴打播歌反擊，紛紛留言「播歌咪一樣影響到人」、「以牙還牙呢個世界好唔安寧」、「五十步笑百步」。其後該位巴打表示對方未有退縮，還越唱越大聲，只是他之後到站落車，未有下集結局可以睇到。

作為音樂人的吳業坤，靈感到時亦有哼歌的習慣，他接受《香港01》訪問，「睇下當時感覺啦，我都會哼歌嘅，如果係公眾場所咪會細聲啲囉，有時在Coffee Shop諗到都會哼，然後錄低囉。其實都唔怕騷擾到人，同平時講嘢差唔多啫。(當時那位巴士阿叔在車上哼歌？)公共空間同交通工具都應該有適當嘅音量嘅，唔好話唱歌，傾偈都會細聲啲啦，總之細細聲唔好騷擾到人，共用緊個空間架嘛。」

對於該名巴打用手機播歌反擊，坤哥就絕對不贊成，「咁樣反擊人嘅話，嗰個人唔夠EQ囉。(遇上這種情況應該如何處理？)應該用言語相勸，大家都係文明人。」坤哥雖然是藝人，但若然不太趕時間，他也會搭巴士，生活其實相當貼地，但說到在車上見到的討厭行徑，「自己好少遇到，有時都會見到啲人坐到伸埋腳去對面位囉。」

至於另一位音樂人陳康健，他表示識他的人都知他愛周圍唱歌，「真係會哼出嚟，記得有次坐的士，司機問我係咪玩音樂嘅，仲估我係歌手，佢話我上車之後就開始哼歌，當時我仲反問有哼歌咩？有啲拍子喺心裡面，不其然出咗嚟自己都唔知。(對於網民播歌反擊哼歌阿叔？)咁佢就衰啲。老實講我哼歌俾人話就未試過，我相信嗰個人哼歌可能係無心嘅，雖然影響到人都唔係咁好，但開喇叭嗰位就唔止影響，佢直頭唔理成車人感受喎。」問到他在巴士遇上的討厭經歷，他表示「我都少搭巴士嘅，就算搭都會避咗人多嘅時間，塞車、環境好侷就會覺得好辛苦，因為自己身體唔係咁好。講返轉頭，香港人又係唔鍾意開聲嘅，開咗聲可能無事喎，咁嘅天氣，36.8度又係熱到令人好躁嘅。」陳康健就講中Point啦，大家講清講楚，總好過用極端手段報復啦。