【開心速遞】林淑敏演惡女入屋　大小姐其實好溫柔：我唔識鬧人

《開心速遞》除了豹哥、長腳蟹等，一眾配角亦搶鏡，大小姐、ＫＣ、Terry、大少、Helen姐等幾位角色都相當入屋，尤其飾演大小姐的林淑敏，今晚(15日)那集尖酸刻薄，亦不懂撒嬌，但現實中的她其實是一位很謙虛的演員，她接受《香港01》訪問時，說：「其實我唔識鬧人㗎，如果我鬧人把聲應該係死氣沉沉，同埋我唔鬧人㗎，我覺得鬧人好嘥力㗎，我唔想個人太易激動，因為我身體情況，如果我冇聽日的話，我今日就要開心，同埋我冇對象鬧人，我老公都唔同我鬧交嘅，我係一個基督徒，我唔係要做一個神聖嘅人，咁over，但起碼俾人知道有啲行為要端正。」

除了大小姐外，網友最記得《真相》劇中飾演濶太的她，那段演出更成為熱門cap圖，那劇後林淑敏不時都會飾演惡女上司或有錢人，今次飾演大小姐，劇中經常鬧呂慧儀、或者「寸」下一班下屬，觀眾睇得開心，但林淑敏歸功背後的工作人員及演員，她說：「我初頭唔識做，我唔知嗰嘴臉應該係點？我要做到好陰質，我記得拍到二十幾集，監製（羅鎮岳）落嚟揸埋攝影機，佢話俾我知部機點影我，大小姐行入嚟應該係點？佢逐句對白同我講一次，語氣係點，咁我先明，之後我哋拍office戲，KC瑞偉哥，佢好似我哋阿媽咁，佢會預早約我哋返去傾劇本，會叫我哋早啲返，大家一齊研究下點做，大家應該點接，所以大家睇我覺得過癮，唔係我功勞，係編劇、監製、導演、瑞偉哥佢哋幫我。」

2011年林淑敏患上第二期乳癌，那時的她更甩了所有頭髮，之後抗癌成功，令她整個人更硬淨、豁達，她說：「我好記得有個討論區留言『佢唔係生cancer咩？點解仲未死？』（有冇覺得唔開心？）唔會喎，咁好多人覺得生癌就會死，老實講，呢個係公民教育唔夠啫，我冇唔開心，因為之後有個人留言話『佢帶咗咁多歡樂俾我哋，我哋應該祝佢身體健康。』我睇到呢個留言好感動。」