《東張》利穎怡被王晶揀中 新劇有份拍：有發揮背部全裸都得﹗
由王晶監製嘅《賭城群英會》剛剛落幕，大家印象最深刻會係邊一個角色？贏比賽輸人生嘅OK仔馬國明？憶夫成狂處女拍劇嘅若蘭麥明詩？最多網友談論嘅應該係中段已經離世，以神級內心戲演活欲哭無淚嘅叻哥陳百祥。之前傳出《賭城群英會》開拍續集，由叻哥揹重飛，劇情入面仲會一人分飾兩角，做孖生兄弟同自己鬥戲，《東張西望》主持利穎怡(Joan)上載一張新劇通告，証實晶哥將開拍《大千世界》。說時遲那時快大家好快又有機會欣賞叻哥演技﹗
於《東張西望》擔任外景主持，穿着小背心報道搶包山，激凸身材被網友注目嘅利穎怡Joan，上載一張新劇通告，「你已被委派演出《大千世界(暫名) 》劇集……該劇集監製王晶先生將於短期內與你聯絡」，証實晶哥將再幫TVB開劇。Joan表示：「(有傳呢套係《賭城群英會》續集？)其實我暫時都未知套劇講d咩，早兩日藝員科Whatsapp呢封信俾我，之前都從來未試過，尋日有打去藝員科問自己係做咩角色，但佢地都話唔清楚要再通知。」
Joan指已經好一段日子無入劇組，之前於《深宮計》中學到好多，一邊擔任主持一邊等待下一個機會：「呢份係今年最好嘅生日禮物﹗自己都有睇《賭城群英會》，估唔到有機會參演晶哥作品。(網友估你有可能係下一個晶女郎﹗)唔敢當呀﹗有份參演我已經好開心，都要喺度多謝網友支持，張圖我只係貼左24小時張時動態，無諗過會被cap去討論區。(晶哥作品嘅女角好多時要性感演出。)如果角色需要，戲份有發揮嘅自己唔會介意。上年幫《東張西望》拍左個feature要著比堅尼，出街後都多左人話我性感，今年刻意減少著比堅尼，不過如果為拍戲自己絕對無問題﹗(性感底線？)只要有發揮，背部全裸都無問題，唔露股就可以啦﹗」
好多人以為Joan係TVB第26期藝員訓練班入行，但其實再之前佢已經客串過《愛回家》。「加拿大讀完書返香港，有兩個目標，做公關或演員。當時做緊公關工作，因緣際會做臨時演員，可能幕後見我有熱誠，介紹我入TVB，第一套拍攝嘅就係《愛回家》。導演以為係訓練班出身，鼓勵我去考藝員訓練班。2年幾前有機會入《東張西望》，本身口才好差，唔同訪問中學到好多野。」
做到固定主持班底有穩定曝光率，同時亦因為檔期被鎖死少左拍劇機會，不過Joan就話感激每個機會：「2年幾前入《東張西望》，本身口才好差，唔同訪問中學到好多野。宜家出街都有人認得係「東張個主持」，希望好快會有戲劇上嘅代表作，如果喺街有人叫角色名會更滿足﹗」Joan透露早前拍攝一套電影擔任女一，同王耀煌、梁証嘉、趙碩之等合作得非常愉快，年尾有機會上映，希望大家睇到佢嘅努力。